lutf un ka aam ho hi jaega

lutf un kā 'aam ho hī jā.egā

shaad har nākām ho hī jā.egā

jaan de do vā'da-e-dīdār par

naqd apnā daam ho hī jā.egā

shaad hai firdaus yā'nī ek din

qismat-e-kHuddām ho hī jā.egā

be-nishānoñ kā nishāñ miTtā nahīñ

miTte-miTte naam ho hī jā.egā

yād-e-gesū zikr-e-haq hai aah kar

dil meñ paidā laam ho hī jā.egā

ek din āvāz badleñge ye saaz

chahchahā kohrām ho hī jā.egā

sā.ilo dāman saḳhī kā thaam lo

kuchh na kuchh in'ām ho hī jā.egā

yād-e-abrū karke taḌpo bulbulo

TukḌe-TukḌe daam ho hī jā.egā

muflisho un kī galī meñ jā paḌo

bāġh-e-ḳhuld ikrām ho hī jā.egā

gar yuuñ hī rahmat kī tāvīleñ rahīñ

mad.h har ilzām ho hī jā.egā

bāda-ḳhvārī kā samāñ bañdhne to do

shaiḳh durd-āshām ho hī jā.egā

ġham to un ko bhuul kar lipTā hai yuuñ

jaise apnā kaam ho hī jā.egā

miT ki gar yūñhī rahā qarz-e-hayāt

jaan kā nīlām ho hī jā.egā

ab to laa.ī hai shafā'at 'afv par

baḌhte-baḌhte 'aam ho hī jā.egā

ai 'razā' har kaam kā ek vaqt hai

dil ko bhī ārām ho hī jā.egā

lutf un ka 'am ho hi jaega

shad har nakaam ho hi jaega

jaan de do wa'da-e-didar par

naqd apna dam ho hi jaega

shad hai firdaus ya'ni ek din

qismat-e-kHuddam ho hi jaega

be-nishanon ka nishan miTta nahin

miTte-miTte nam ho hi jaega

yaad-e-gesu zikr-e-haq hai aah kar

dil mein paida lam ho hi jaega

ek din aawaz badlenge ye saz

chahchaha kohram ho hi jaega

sailo daman saKHi ka tham lo

kuchh na kuchh in'am ho hi jaega

yaad-e-abru karke taDpo bulbulo

TukDe-TukDe dam ho hi jaega

muflisho un ki gali mein ja paDo

bagh-e-KHuld ikram ho hi jaega

gar yun hi rahmat ki tawilen rahin

madh har ilzam ho hi jaega

baada-KHwari ka saman bandhne to do

shaiKH durd-asham ho hi jaega

gham to un ko bhul kar lipTa hai yun

jaise apna kaam ho hi jaega

miT ki gar yunhi raha qarz-e-hayat

jaan ka nilam ho hi jaega

ab to lai hai shafa'at 'afw par

baDhte-baDhte 'am ho hi jaega

ai 'raza' har kaam ka ek waqt hai

dil ko bhi aaram ho hi jaega