kabhi ai haqiqat-e-muntazir nazar aa libas-e-majaz mein

kabhī ai haqīqat-e-muntazir nazar aa libās-e-majāz meñ

ki hazāroñ sajde taḌap rahe haiñ mirī jabīn-e-niyāz meñ

tarab āshnā-e-ḳharosh ho to navā hai mahram-e-gosh ho

vo surūd kyā ki chhupā huā ho sukūt-e-parda-e-sāz meñ

tū bachā-bachā ke na rakh use tirā ā.īna hai vo ā.īna

ki shikasta ho to ’azīz-tar hai nigāh-e-ā.īna-sāz meñ

na kahīñ jahāñ meñ amaañ milī jo amaañ milī to kahāñ milī

mire jurm-e-ḳhāna-ḳharāb ko tire ’afv-e-banda-navāz meñ

na vo 'ishq meñ rahīñ garmiyāñ na vo husn meñ rahīñ shoḳhiyāñ

na vo ġhaznavī meñ taḌap rahī na vo ḳham hai zulf-e-ayāz meñ

jo maiñ sar-ba-sajda huā kabhī to zamīñ se aane lagī sadā

tirā dil to hai sanam-āshnā tujhe kyā milegā namāz meñ

kabhi ai haqiqat-e-muntazir nazar aa libas-e-majaz mein

ki hazaron sajde taDap rahe hain meri jabin-e-niyaz mein

tarab aashna-e-KHarosh ho to nawa hai mahram-e-gosh ho

wo surud kya ki chhupa hua ho sukut-e-parda-e-saz mein

tu bacha-bacha ke na rakh use tera aaina hai wo aaina

ki shikasta ho to ’aziz-tar hai nigah-e-aina-saz mein

na kahin jahan mein aman mili jo aman mili to kahan mili

mere jurm-e-KHana-KHarab ko tere ’afw-e-banda-nawaz mein

na wo 'ishq mein rahin garmiyan na wo husn mein rahin shoKHiyan

na wo ghaznawi mein taDap rahi na wo KHam hai zulf-e-ayaz mein

jo main sar-ba-sajda hua kabhi to zamin se aane lagi sada

tera dil to hai sanam-ashna tujhe kya milega namaz mein