manzil ki justuju thi pe manzil na mil saki

manzil kī justujū thī pe manzil na mil sakī

ham ko kisī tarah tirī mahfil na mil sakī

ham ne har ek gaam ko manzil banā liyā

āsāniyāñ to mil ga.iiñ mushkil na mil sakī

ġham bhī masarratoñ kī tarah se hai aarzī

māyūs ġham ko lazzat kāmil na mil sakī

dekhīñ hazār chashm-e-tamannā ne mahfileñ

jis kī talāsh thī vahī mahfil na mil sakī

rahrav bhī mere saath hī gum-gashta ho ga.e

ik baar mil ke phir kabhī manzil na mil sakī

jab se huā hai dast-e-talab ġham se be-niyāz

dast-e-gadā ko lazzat-e-sā.el na mil sakī

ik baar aake phir kabhī tūfāñ na aa sakā

kashti-e-dil ko dūrī-e-sāhil na mil sakī

'bahzād' us kī ziist koī ziist hī nahīñ

jis ko atā-e-murshid-e-kāmil na mil sakī

manzil ki justuju thi pe manzil na mil saki

hum ko kisi tarah teri mahfil na mil saki

hum ne har ek gam ko manzil bana liya

aasaniyan to mil gain mushkil na mil saki

gham bhi masarraton ki tarah se hai aarzi

mayus gham ko lazzat kaamil na mil saki

dekhin hazar chashm-e-tamanna ne mahfilen

jis ki talash thi wahi mahfil na mil saki

rahraw bhi mere sath hi gum-gashta ho gae

ek bar mil ke phir kabhi manzil na mil saki

jab se hua hai dast-e-talab gham se be-niyaz

dast-e-gada ko lazzat-e-sael na mil saki

ek bar aake phir kabhi tufan na aa saka

kashti-e-dil ko duri-e-sahil na mil saki

'bahzad' us ki zist koi zist hi nahin

jis ko ata-e-murshid-e-kaamil na mil saki