har shai ko mere dil se bhulate hue aate

har shai ko mire dil se bhulāte hue aate

aanā thā to behosh banāte hue aate

mad.hoshiyoñ ko hosh meñ laate hue aate

aate mirī duniyā ko jagāte hue aate

har zarre ko ik tuur banāte hue aate

ye ho na sakā jalve luTāte hue aate

ashkoñ pe girāte mire tum barq-e-tabassum

paanī meñ zarā aag lagāte hue aate

duniyā ko to ik aan meñ behosh kiyā thā

mujh ko bhī har ik chiiz bhulāte hue aate

kHuddārī-e-ulfat bhī koī chiiz thī 'bahzād'

har gaam pe kyuuñ sar ko jhukāte hue aate

har shai ko mere dil se bhulate hue aate

aana tha to behosh banate hue aate

madhoshiyon ko hosh mein late hue aate

aate meri duniya ko jagate hue aate

har zarre ko ek tur banate hue aate

ye ho na saka jalwe luTate hue aate

ashkon pe giraate mere tum barq-e-tabassum

pani mein zara aag lagate hue aate

duniya ko to ek aan mein behosh kiya tha

mujh ko bhi har ek chiz bhulate hue aate

kHuddari-e-ulfat bhi koi chiz thi 'bahzad'

har gam pe kyun sar ko jhukate hue aate