KHuda ra na suniye ki kya kah raha hun

ḳhudā rā na suniye ki kyā kah rahā huuñ

maiñ hāl-e-dil mubtalā kah rahā huuñ

na hasrat na meñ mudda.ā kah rahā huuñ

use tum samajh lo ki kyā kah rahā huuñ

hai har mauj mujh ko Dubone kī koshāñ

meñ har mauj ko nāḳhudā kah rahā huuñ

ḳhudā jaane ab aur aage kahūñ kyā

abhī tak vafā ko vafā kah rahā huuñ

bhalā aur kyā hogī me.arāj-e-ulfat

tirī har jafā ko vafā kah rahā huuñ

sambhālo sambhālo mirā dīn-o-īmāñ

ki maiñ be-ḳhudī ko ḳhudā kah rahā huuñ

mirā qissa-e-ġham umūmī nahīñ hai

zamāne se bilkul judā kah rahā huuñ

mohabbat meñ Duubā hai har lafz merā

ye tum jānte ho ki kyā kah rahā huuñ

vafā un se 'bahzād' kī to hai lekin

maiñ us ko bhī apnī ḳhatā kah rahā huuñ

KHuda ra na suniye ki kya kah raha hun

main haal-e-dil mubtala kah raha hun

na hasrat na mein muddaa kah raha hun

use tum samajh lo ki kya kah raha hun

hai har mauj mujh ko Dubone ki koshan

mein har mauj ko naKHuda kah raha hun

KHuda jaane ab aur aage kahun kya

abhi tak wafa ko wafa kah raha hun

bhala aur kya hogi mearaj-e-ulfat

teri har jafa ko wafa kah raha hun

sambhaalo sambhaalo mera din-o-iman

ki main be-KHudi ko KHuda kah raha hun

mera qissa-e-gham umumi nahin hai

zamane se bilkul juda kah raha hun

mohabbat mein Duba hai har lafz mera

ye tum jaante ho ki kya kah raha hun

wafa un se 'bahzad' ki to hai lekin

main us ko bhi apni KHata kah raha hun