raushan jahan hai jis se wo mahfil tumhein to ho

raushan jahāñ hai jis se vo mahfil tumheñ to ho

dil jis ko DhūñDhtā hai vo manzil tumheñ to ho

kahtā huuñ apnā dil jise vo dil tumhīñ to ho

mere jahān-e-ishq kā hāsil tumhīñ to ho

jo mauj kī hai aas jo kashtī kā aasrā

dariyā-e-dard-o-ġham kā vo sāhil tumhīñ to ho

mushkil nahii. zarā bhī vo āsān shai huuñ meñ

hal jis kā kuchh nahii. hai vo mushkil tumheñ to ho

is raah ġham meñ aur bhaTakne to do mujhe

rahbar kā kaam kiyā hai ke manzil tumheñ to ho

mushkil to kuchh nahīñ mirī uqda-kushā.iyāñ

mushkil ye aa paḌī hai ki mushkil tumhīñ to ho

dekho udaas hone na paa.e ye bazm-e-ishq

ye bhī ḳhabar hai sāhab-e-mahfil tumhīñ to ho

un ko sunā rahā huuñ ġham-e-dil kī dāstāñ

kyā ye bhī khol duuñ ki ġham-e-dil tumhīñ to ho

hasrat se dekhte ho sujūd-e-vafā magar

'bahzād' mubtalā ke muqābil tumhīñ to ho

raushan jahan hai jis se wo mahfil tumhein to ho

dil jis ko DhunDhta hai wo manzil tumhein to ho

kahta hun apna dil jise wo dil tumhin to ho

mere jahan-e-ishq ka hasil tumhin to ho

jo mauj ki hai aas jo kashti ka aasra

dariya-e-dard-o-gham ka wo sahil tumhin to ho

mushkil nahi zara bhi wo aasan shai hun mein

hal jis ka kuchh nahi hai wo mushkil tumhein to ho

is rah gham mein aur bhaTakne to do mujhe

rahbar ka kaam kiya hai ke manzil tumhein to ho

mushkil to kuchh nahin meri uqda-kushaiyan

mushkil ye aa paDi hai ki mushkil tumhin to ho

dekho udas hone na pae ye bazm-e-ishq

ye bhi KHabar hai sahab-e-mahfil tumhin to ho

un ko suna raha hun gham-e-dil ki dastan

kya ye bhi khol dun ki gham-e-dil tumhin to ho

hasrat se dekhte ho sujud-e-wafa magar

'bahzad' mubtala ke muqabil tumhin to ho