qalb-o-nazar pe aap sitam Dha ke chal diye

qalb-o-nazar pe aap sitam Dhā ke chal diye

allāh re be-ruḳhī mujhe taḌpā ke chal diye

kyā ishq kī nigāh se sharmā ke chal diye

yā mere iztirāb se ghabrā ke chal diye

kyā zindagī-e-ġham pe tumheñ pyaar āgayā

mujh par nigāh-e-lutf jo farmā ke chal diye

dekhā jo izhdihām-e-tamannā-o-ārzū

nīchī nazar kiye hue iThlā ke chal diye

kuchh to zabāñ se kahiye koī baat kījiye

aa.e the kis liye bhalā kyuuñ aake chal diye

aane ko apne va.ada-e-fardā pe Taal kar

'bahzād' aaj vo tujhe bahlā ke chal diye

qalb-o-nazar pe aap sitam Dha ke chal diye

allah re be-ruKHi mujhe taDpa ke chal diye

kya ishq ki nigah se sharma ke chal diye

ya mere iztirab se ghabra ke chal diye

kya zindagi-e-gham pe tumhein pyar aagaya

mujh par nigah-e-lutf jo farma ke chal diye

dekha jo izhdiham-e-tamanna-o-arzu

nichi nazar kiye hue iThla ke chal diye

kuchh to zaban se kahiye koi baat kijiye

aae the kis liye bhala kyun aake chal diye

aane ko apne wada-e-farda pe Tal kar

'bahzad' aaj wo tujhe bahla ke chal diye