hum wasl mein aise khoe gae furqat ka zamana bhul gae

ham vasl meñ aise kho.e ga.e furqat kā zamānā bhuul ga.e

sāhil kī ḳhushī meñ maujoñ kā tūfān uThānā bhuul ga.e

āñkhoñ meñ jo sūrat thī un kī ġhairoñ se chhupānā bhuul ga.e

phūloñ kī mohabbat meñ dāman kāñToñ se bachānā bhuul ga.e

dil rakh to liyā va.ada kar ke aur va.ade pe aanā bhuul ga.e

yā ye ki mohabbat vo na rahī yā naaz uThānā bhuul ga.e

betābī-e-dil ke hāthoñ se tauhīn-e-mohabbat ho na sakī

achchhā bhī huā jab vo aa.e ham haal sunānā bhuul ga.e

jab chāhne vaale ḳhatm hue us vaqt unheñ ehsās huā

ab yaad meñ un kī rote haiñ hañs hañs ke rulānā bhuul ga.e

jiinā hai tire hī qadmoñ meñ marnā hai tire hī qadmoñ meñ

kyā ḳhuub huā ham dar se tire sar apnā uThānā bhuul ga.e

kyuuñ nīchī nigāhoñ se mujh ko paimāna dikhā kar hañste ho

āñkheñ to milā kar baat kaaro nazroñ se pilānā bhuul ga.e

yā tū ne nazar ḳhīra kar dī ai barq-e-tajallī yā ham hī

dīdār meñ apnī āñkhoñ kā ehsān uThānā bhuul ga.e

ḳhud aap ne apne 'kāmil' ko dīvāna banā kar chhoḌā hai

ab hosh uḌe kyuuñ jaate haiñ kyā hosh uḌānā bhuul ga.e

hum wasl mein aise khoe gae furqat ka zamana bhul gae

sahil ki KHushi mein maujon ka tufan uThana bhul gae

aankhon mein jo surat thi un ki ghairon se chhupana bhul gae

phulon ki mohabbat mein daman kanTon se bachana bhul gae

dil rakh to liya wada kar ke aur wade pe aana bhul gae

ya ye ki mohabbat wo na rahi ya naz uThana bhul gae

betabi-e-dil ke hathon se tauhin-e-mohabbat ho na saki

achchha bhi hua jab wo aae hum haal sunana bhul gae

jab chahne wale KHatm hue us waqt unhen ehsas hua

ab yaad mein un ki rote hain hans hans ke rulana bhul gae

jina hai tere hi qadmon mein marna hai tere hi qadmon mein

kya KHub hua hum dar se tere sar apna uThana bhul gae

kyun nichi nigahon se mujh ko paimana dikha kar hanste ho

aankhen to mila kar baat karo nazron se pilana bhul gae

ya tu ne nazar KHira kar di ai barq-e-tajalli ya hum hi

didar mein apnī aankhon ka ehsan uThana bhul gae

KHud aap ne apne 'kaamil' ko diwana bana kar chhoDa hai

ab hosh uDe kyun jate hain kya hosh uDana bhul gae