kamar bāñdhe hue chalne ko yañ sab yar baiThe haiñ

kamar bāñdhe hue chalne ko yaañ sab yaar baiThe haiñ

bahut aage ga.e baaqī jo haiñ tayyār baiThe haiñ

na chheḌ ai nik.hat-e-bād-e-bahārī raah lag apnī

tujhe aTkheliyāñ sūjhī haiñ ham be-zār baiThe haiñ

ḳhayāl un kā pare hai arsh-e-āzam se kahīñ saaqī

ġharaz kuchh aur dhun meñ is ghaḌī mai-ḳhvār baiThe haiñ

basān-e-naqsh-e-pā-e-rah-ravāñ kū-e-tamannā meñ

nahīñ uThne kī tāqat kyā kareñ lāchār baiThe haiñ

ye apnī chaal hai uftādgī se in dinoñ pahroñ

nazar aayā jahāñ par sāya-e-dīvār baiThe haiñ

kaheñ haiñ sabr kis ko aah nañg o naam hai kyā shai

ġharaz ro piiT kar un sab ko ham yak baar baiThe haiñ

kahīñ bose kī mat jur.at dilā kar baiThiyo un se

abhī is had ko vo kaifī nahīñ hushyār baiThe haiñ

najīboñ kā ajab kuchh haal hai is daur meñ yaaro

jise pūchho yahī kahte haiñ ham bekār baiThe haiñ

na.ī ye vaz.a sharmāne kī sīkhī aaj hai tum ne

hamāre paas sāhab varna yuuñ sau baar baiThe haiñ

kahāñ gardish falak kī chain detī hai sunā 'inshā'

ġhanīmat hai ki ham sūrat yahāñ do-chār baiThe haiñ

kamar bāñdhe hue chalne ko yañ sab yar baiThe haiñ

bahut aage gae baqī jo haiñ tayyār baiThe haiñ

na chheḌ ai nikhat-e-bād-e-bahārī rah lag apnī

tujhe aTkheliyāñ sūjhī haiñ hum be-zār baiThe haiñ

ḳhayāl un kā pare hai arsh-e-āzam se kahīñ saqī

ġharaz kuchh aur dhun meñ is ghaḌī mai-ḳhwār baiThe haiñ

basān-e-naqsh-e-pā-e-rah-rawāñ kū-e-tamannā meñ

nahīñ uThne kī tāqat kyā kareñ lāchār baiThe haiñ

ye apnī chaal hai uftādgī se in dinoñ pahroñ

nazar aayā jahāñ par sāya-e-dīwār baiThe haiñ

kaheñ haiñ sabr kis ko aah nañg o nam hai kyā shai

ġharaz ro piT kar un sab ko hum yak bar baiThe haiñ

kahīñ bose kī mat jurat dilā kar baiThiyo un se

abhī is had ko wo kaifī nahīñ hushyār baiThe haiñ

najīboñ kā ajab kuchh haal hai is daur meñ yaro

jise pūchho yahī kahte haiñ hum bekār baiThe haiñ

naī ye waza sharmāne kī sīkhī aaj hai tum ne

hamāre pas sāhab warna yuñ sau bar baiThe haiñ

kahāñ gardish falak kī chain detī hai sunā 'inshā'

ġhanīmat hai ki hum sūrat yahāñ do-chār baiThe haiñ