hayat-e-ishq ka ek sarmadi payam aaya

hayāt-e-'ishq kā ik sarmadī payām aayā

nabī ke naam pe marnā bhī kitnā kaam aayā

tarīq-e-'ishq meñ aisā bhī ik maqām aayā

ḳhudā ke naam se pahle nabī kā naam aayā

yahī samajh ke idhar bhī ho ik nigāh-e-karam

hamāre dar ke ġhulāmoñ kā ik ġhulām aayā

tumhīñ to ārzū-e-dil tumhīñ to maqsad-e-jāñ

na.ī hayāt milī jab tumhārā naam aayā

sagān-e-dar se bhī nisbat hai jin ko hazrat ke

zahe-nasīb agar un meñ hamārā naam aayā

ḳhudā darāz kare 'umr-e-soz-e-'ishq nabī

sulūk ġham kī har ik moḌ par ye kaam aayā

nabī ke mus.haf-e-ruḳh par jahāñ nigāh paḌī

hamāre sāmne sajde kā ik maqām aayā

ḳhatā mu'āf ho parvarda-e-'ināyat kī

huzūr le ke jo maiñ nā't-e-nā-tamām aayā

qadam huzūr ke dekho tumhārā sar dekho

junūñ meñ kab se ye 'kāmil' ḳhayāl-e-ḳhām aayā

hayat-e-'ishq ka ek sarmadi payam aaya

nabi ke nam pe marna bhi kitna kaam aaya

tariq-e-'ishq mein aisa bhi ek maqam aaya

KHuda ke nam se pahle nabi ka nam aaya

yahi samajh ke idhar bhi ho ek nigah-e-karam

hamare dar ke ghulamon ka ek ghulam aaya

tumhin to aarzu-e-dil tumhin to maqsad-e-jaan

nai hayat mili jab tumhaara nam aaya

sagan-e-dar se bhi nisbat hai jin ko hazrat ke

zahe-nasib agar un mein hamara nam aaya

KHuda daraaz kare 'umr-e-soz-e-'ishq nabi

suluk gham ki har ek moD par ye kaam aaya

nabi ke mushaf-e-ruKH par jahan nigah paDi

hamare samne sajde ka ek maqam aaya

KHata mu'af ho parwarda-e-'inayat ki

huzur le ke jo main na't-e-na-tamam aaya

qadam huzur ke dekho tumhaara sar dekho

junun mein kab se ye 'kaamil' KHayal-e-KHam aaya