jaan pe khela hun main mera jigar dekhna

jaan pe khelā huuñ maiñ merā jigar dekhnā

jī na rahe yā rahe mujh ko idhar dekhnā

garche vo ḳhurshīd-rū nit hai mere sāmne

to bhī mayassar nahīñ bhar ke nazar dekhnā

so bhī na to koī dam dekh sakā ai falak

aur to yaañ kuchh na thā ek magar dekhnā

zikr-e-vafā kījiye us se jo vāqif na ho

kahte ho kis se ye tum Tuk to idhar dekhnā

misl-e-sharar tañg chashm-e-hastī be-būd hai

dekh na saktā use Tuk bhī jidhar dekhnā

nāla-e-dil kā asar dekh liyā 'dard' bas

jī meñ na rah jaa.e ye aah bhī kar dekhnā

jaan pe khela hun main mera jigar dekhna

ji na rahe ya rahe mujh ko idhar dekhna

garche wo KHurshid-ru nit hai mere samne

to bhi mayassar nahin bhar ke nazar dekhna

so bhi na to koi dam dekh saka ai falak

aur to yan kuchh na tha ek magar dekhna

zikr-e-wafa kijiye us se jo waqif na ho

kahte ho kis se ye tum Tuk to idhar dekhna

misl-e-sharar tang chashm-e-hasti be-bud hai

dekh na sakta use Tuk bhi jidhar dekhna

nala-e-dil ka asar dekh liya 'dard' bas

ji mein na rah jae ye aah bhi kar dekhna