la-makan mein ghar banaya yar ne

lā-makāñ meñ ghar banāyā yaar ne

ham ko yaañ dar-dar phirāyā yaar ne

mar ga.e jab ham to vo zāhir huā

dekhiye kab muñh dikhāyā yaar ne

bar-sar-e-bām aake ḳhud jalva kiyā

sab ko hairat meñ phañsāyā yaar ne

saara a.alam ho gayā zer-e-hijāb

ruḳh se jab parda uThāyā yaar ne

aap dekhā us ne apne aap ko

ham ko ā.īna banāyā yaar ne

maiñ to us ko DhūñDhtā hī rah gayā

dil meñ mere ghar banāyā yaar ne

ek sar-e-mū bhī na bigḌeñge kabhī

ham ko kuchh aisā banāyā yaar ne

mere chalne kī ḳhabar mujh ko na kī

aisā dar-parda chalāyā yaar ne

saarā a.alam ho gayā naqsh bar-āb

apnā jab naqsha jamāyā yaar ne

ho gayā dāman jhaTak kar aap alag

ḳhaak meñ ham ko milāyā yaar ne

jab talak ham the na paaya yaar ko

phir to ham ko bhī na paaya yaar ne

kufr-o-dīñ nazroñ se donoñ gir ga.e

aisā nazroñ par chaḌhāyā yaar ne

kar diyā siflī ko 'ulvī' baat meñ

mujh ko vo nukta batāyā yaar ne

la-makan mein ghar banaya yar ne

hum ko yan dar-dar phiraya yar ne

mar gae jab hum to wo zahir hua

dekhiye kab munh dikhaya yar ne

bar-sar-e-baam aake KHud jalwa kiya

sab ko hairat mein phansaya yar ne

sara aalam ho gaya zer-e-hijab

ruKH se jab parda uThaya yar ne

aap dekha us ne apne aap ko

hum ko aaina banaya yar ne

main to us ko DhunDhta hi rah gaya

dil mein mere ghar banaya yar ne

ek sar-e-mu bhi na bigDenge kabhi

hum ko kuchh aisa banaya yar ne

mere chalne ki KHabar mujh ko na ki

aisa dar-parda chalaya yar ne

sara aalam ho gaya naqsh bar-ab

apna jab naqsha jamaya yar ne

ho gaya daman jhaTak kar aap alag

KHak mein hum ko milaya yar ne

jab talak hum the na paya yar ko

phir to hum ko bhi na paya yar ne

kufr-o-din nazron se donon gir gae

aisa nazron par chaDhaya yar ne

kar diya sifli ko 'ulwi' baat mein

mujh ko wo nukta bataya yar ne