samt kashi se chala jaanib-e-mathura baadal

samt kāshī se chalā jānib-e-mathurā bādal

barq ke kāñdhe pe laatī hai sabā gañgā jal

ghar meñ ashnān kareñ sarv-e-qadān-e-gokul

jā ke jamunā pe nahānā bhī hai ik tuul 'amal

ḳhabar uḌtī huī aa.ī hai mahāban meñ abhī

ki chale aate haiñ thīrth ko havā par bādal

tah-o-bālā kiye dete haiñ havā ke jhoñke

beḌe bhādoñ ke nikalte haiñ bhare gañgā jal

kabhī Duubī kabhī uchhlī mah-e-nau kī kashtī

bahr-e-aḳhzar meñ talātum se paḌī hai halchal

shab-e-daijūr añdhere meñ hai bādal ke nihāñ

lailā-e-mahmil meñ hai Daale hue muñh par āñchal

ātish-e-gul kā dhuāñ bām-e-falak par pahuñchā

jam gayā manzil-e-ḳhurshīd kī chhat meñ kājal

jis taraf se ga.ī bijlī phir idhar aa na sakī

qila-e-charḳh meñ hai bhūl-bhulayyāñ bādal

ā.īna aab tamavvuj se bahā jaatā hai

kahiye tasvīr se girnā na kahīñ dekh sambhal

aaj ye nushv-o-numā kā hai sitāra chamkā

shāḳh meñ kāhkashāñ ki nikal aa.ī kopal

ḳhizr farmāte haiñ sumbul se tirī 'umr-e-drāz

phuul se kahte haiñ phaltā rahe gulzār-e-amal

dekhte-dekhte baḌh jaatī hai gulshan kī bahār

dīda-e-nargis-e-shahlā ko na samjho ahval

lahreñ letā hai jo bijlī ke muqābil sabza

charḳh par bādalā phailā hai zamīñ par maḳhmal

ham-zabāñ vasf-e-chaman meñ hue sab ahl-e-chaman

tūtiyoñ kī hai jo tazmīn to bulbul kī ġhazal

jugnū phirte haiñ jo gulbun meñ to aatī hai nazar

mus.haf-e-gul ke havāshī pe tilā.ī jadval

shāḳh par phuul haiñ jumbish meñ zamīñ par sumbul

sab havā khāte haiñ gulshan meñ savār-o-paidal

aah qumrī meñ mazā aur maze meñ tāsīr

sarv meñ dekhiye phuul aane lage phuul meñ phal

ḳhanda-hā-e-gul-e-qālīñ se huā shor-e-nushūr

kyā 'ajab hai jo pareshān hai ḳhvāb-e-maḳhmal

shāḳh-e-shamshād pe qumrī se kaho chheḌe malār

naunihālān-e-gulistāñ ko sunā.e ye ġhazal

turfa gardish meñ giraftār 'ajab pher meñ hai

surma hai niiñd mirī dīda-e-bedār kharal

samt kāshī se gayā jānib-e-mathurā bādal

tairtā hai kabhī gañgā kabhī jamunā bādal

samt kāshī se gayā jānib-e-mathurā bādal

burj meñ aaj sar-e-kishn hai kaalā bādal

shāhid-e-gul kā liye saath hai Dolā bādal

barq kahtī hai mubārak tujhe sehrā bādal

kHuub chhāyā hai sar-e-gokul-o-mathurā bādal

rañg meñ aaj kanhaiyā ke hai Duubā bādal

sat.h-e-aflāk nazar aatī hai gañgā-jamunī

ruup bijlī kā sunahrā hai rūpahlā bādal

charḳh par bijlī kī chal phir se nazar aatā hai

sabza chamkā.e hilātā huā barchhā bādal

bijlī do chaar qadam chal ke palaT jaa.e na kyuuñ

vo añdherā hai ki phirtā hai bhaTaktā bādal

jab talak burj meñ jamunā hai ye khulne kā nahīñ

hai qasam khaa.e uThā.e hue gañgā bādal

chashma-e-mahr hai aks-e-zar-e-gul se dariyā

partav-e-barq se hai sone kā bajrā bādal

mirī āñkhoñ meñ samātā nahīñ ye josh-o-ḳharosh

kisī be-dard ko dikhlā ye karishma bādal

tapish-e-dil kā uḌāyā huā naqsha bijlī

chashm-e-pur aab kā dhoyā huā ḳhāka bādal

dil-e-be-tāb kī adnā sī chamak hai bijlī

chashm-e-pur-āb kā hai ek karishma bādal

apnī kam-zarfiyoñ se laakh falak par chaḌh jaa.e

merī āñkhoñ kā hai utrā huā sadqa bādal

kuchh hañsī khel nahīñ joshish-e-girya kā zabt

ye mirā dil hai ye merā hai kalejā bādal

raaja andar hai parī-kHāna-e-mai kā paanī

naġhma-e-mai kā sar-e-kishn kanhaiyā bādal

dekhtā gar kahīñ 'mohsin' kī fuġhān-o-zārī

na garajtā kabhī aisā na barastā bādal

phir chalā ḳhāma qasīda kī taraf bā'd-e-ġhazal

ki hai chakkar meñ suḳhan-go kā dimāġh-e-muḳhtal

mai-e-gul-rañg hai kyā sham'-e-shab-e-fikr kā phuul

chalte-chalte jo qalam haath se jaatā hai nikal

hai suḳhan-go ko na inshā kī na imlā kī ḳhabar

hoga.ī nazm kī inshā kī ḳhabar sab muhmal

dil meñ kuchh aur hai par muñh se nikaltā hai kuchh aur

lafz be-mā'nī haiñ aur mā'nī haiñ sab be-aTkal

kitnā be-qaid huā kitnā ye āvāra phirā

koī mandir na bachā us se na koī astal

kabhī gañgā pe bhaTaktā hai kabhī jamunā par

ghāghrā par kabhī guzrā kabhī sū-e-chammal

chhīñTe dene se na mahfūz rahī qulzum-o-nīl

na bachā ḳhaak uḌāne se koī dasht-o-jabal

haañ ye sach hai ki tabī'at ne uḌāyā jo ġhubār

huī ā.īna-e-mazmūñ kī do-chandāñ saiqal

ik zarā dekhiye kaifiyat-e-me'arāj-e-suḳhan

haath meñ jām-e-zuhal shīsha-e-mah zer-e-baġhal

girte paḌte kahāñ mastāna kahāñ rakkhā paañv

ki tasavvur bhī jahāñ jā na sake farq ke bal

yā'nī us nuur ke maidān meñ pahuñchā ki jahāñ

ḳhirman-e-barq-e-tajallī kā laqab hai bādal

tār-e-bārān-e-musalsal hai malā.ik kā durūd

bahr-e-tasbīh ḳhudāvand jahāñ 'azz-o-jal

kahīñ tuubā kahīñ kausar kahīñ firdaus-e-barīñ

kahīñ bahtī huī nahr-e-labn-o-'asal

kahīñ jibrīl hukūmat pe kahīñ isrāfīl

kahīñ rizvāñ kā kahīñ sāqī-e-kausar kā 'amal

kanz-e-maḳhfī ke kisī samt nihāñ tah-kHāne

ik taraf maz.har-e-qudrat ke 'ayāñ shīsh-mahal

āshiq-e-jalva talab-gār kahīñ chashm-e-qubūl

nāz-e-mahbūb ke parde meñ kahīñ husn-e-'amal

gul-e-be-rañgī-e-mutlaq se lahakte gulzār

be-niyāzī ke riyāhīñ se mahakte jañgal

bāġh-e-tanzīh meñ sarsabz nihāl-e-tashbīh

ambiyā jis kī haiñ shāḳheñ 'urfā haiñ kopal

gul-e-ḳhush-rañg rasūl-e-madanī 'arabī

zeb-e-dāmān-e-abad turra-e-dastār-e-azal

na koī us kā mushābah hai na ham-sar na nazīr

na koī us kā mumāsil na muqābil na badal

auj-e-rif'at kā qamar naḳhl-e-do-'ālam kā samar

bahr-e-vahdat kā guhar chashma-kasrat kā kañval

mehr-e-tauhīd kī zau auj-e-sharaf kā mah-e-nau

sham'-e-ījād kī lau bazm-e-risālat kā kañval

marja'-e-rūh-e-amīñ zeb-dih 'arsh-e-barīñ

hāmī-e-dīn-e-matīñ nāsiḳh-e-adiyān-o-milal

haft-e-'iqlīm-e-vilāyat meñ shah-e-'ālī-jāh

chaar atrāf-e-hidāyat meñ nabī-e-mursal

jī meñ aatā hai likhūñ matla'-e-barjasta agar

vajd meñ aa ke qalam haath se jaa.e na uchhal

muntaḳhab nusḳha-e-vahdat kā ye thā roz-e-azal

ki na ahmad kā hai saanī na ahad kā avval

daur-e-ḳhurshīd kī bhī hashr meñ ho jā.egī sub.h

tā abad dūr-e-mohammad kā hai roz-e-avval

shab-e-isrā meñ tajallī se rū-e-anvar kī

paḌ ga.ī gardan-e-zafraf meñ sunahrī haikal

sajda-e-shukr meñ hai nāsiya-e-'arsh-e-barīñ

ḳhaak se pā-e-muqaddas kī lagā kar sandal

afzaliyyat pe tirī mushtamil āsār-o-kutub

avāliyat pe tirī muttafiq adyān-o-milal

lutf se tere huī shaukat-e-īmāñ mohkam

qahr se saltanat-e-kufar huī mustāsil

jis taraf haath baḌhīñ kufr ke chhaT jaa.eñ qadam

jis jagah paañv rakheñ sajda kareñ lāt-o-hubal

ho sakā hai kahīñ mahbūb-e-ḳhudā ġhair-e-ḳhudā

ik zarā dekh samajh kar mari chashm-e-ahval

raf’ hone kā na thā vahdat-o-kasrat kā ḳhilāf

miim ahmad ne kiyā aa ke ye qissa faisal

nazar aa.e mujhe ahmad meñ agar dāl-e-duī

roz-e-mahshar huuñ ilāhī merī āñkheñ ahval

phir usī tarz kī mushtāq hai mavvājī-e-tab’

ki hai us bahr meñ ik qāfiya achchhā bādal

kyā jhukā kā'be kī jānib ko hai qibla bādal

sajde karatā hai sū-e-taiba-o-batahā bādal

chhoḌ kar but-kada-e-hind-o-sanam-kHāna-e-burj

aaj kā’ba meñ bichhā.e hai musallā bādal

sabza-e-charḳh ko añdhyārī lagā kar laayā

shahsavār-e-’arabī ke liye kaalā bādal

bahr-e-imkā۔n meñ rasūl-e-’arabī durr-e-yatīm

rahmat-e-ḳhās ḳhudāvand-e-tā'tā bādal

qibla-e-ahl-e-nazar kā'ba-e-abrū-e-huzūr

mū-e-sar qible ko ghere hue kaalā bādal

rashk se sho.ala-e-ruḳhsār ke rotī hai baraq

barq ke muñh pe rakkhe hue pallā bādal

duur pahuñchī lab-e-jāñ-baḳhsh-e-nabī kī shohrat

sun zarā kahte haiñ kyā hazrat-e-īsā.ī bādal

chashm-e-insāf se dekh aap ke dandān-e-sharīf

durr-e-yaktā hai terā garche yagāna bādal

thā bandhā taar farishtoñ kā dar-e-aqdas par

shab-e-me’arāj meñ thā 'arsh-e-mu'allā bādal

āmad-o-raft meñ thā ham-qadam-e-barq burrāq

murġh-zār-e-chaman-e-’ālam-e-bālā bādal

haf-iqlīm meñ us diiñ kā bajā hai Dañkā

thā tirī aam risālat kā garajtā bādal

āstāne kā tire dahr meñ vo rutba hai

ki jo niklā to jhukā.e hue kāñdhā bādal

tū vo faiyyaz hai dar par tire saa.il kī tarah

falak-e-pīr ko laayā diye kāñdhā bādal

teġh-e-maidān-e-shujā’at meñ chamaktī bijlī

haath gulzār-e-saḳhāvat meñ barastā bādal

'mohsin' ab kījiye gulzār-e-munājāt kī sair

ki ijābat kā chalā aatā hai gahirā bādal

sab se ’aalā tirī sarkār hai sab se afzal

mere īmān-e-mufassal kā yahī hai mujmal

hai tamannā ki rahe naa’t se terī ḳhālī

na mirā sher na qit.a na qasīda na ġhazal

dīn-o-duniyā meñ kisī kā na sahārā ho mujhe

sirf terā hī bharosa tirī quvvat tirā bal

ho mirā resha-e-ummīd vo naḳhl-e-sarsabz

jis kī har shāḳh meñ ho phuul har ik phuul meñ phal

aarzū hai ki tirā dhyān rahe tā-dam-e-marg

shakl terī nazar aa.e mujhe jab aa.e ajal

ruuh se merī kahīñ pyaar se yuuñ 'izrā.īl

ki mirī jaan madīne ko jo chaltī hai to chal

dam-e-murdan ye ishāra ho shafā.at kā tirī

fikr-e-fardā tu na kar dekh liyā jā.egā kal

yād-e-ā.īna-e-ruḳhsār se hairat ho mujhe

gosha-e-qabr nazar aa.e mujhe shīsh-mahal

mezbāñ ban ke nakīrain kaheñ ghar hai tirā

na uThānā koī taklīf na honā bekal

ruḳh-e-anvar kā tire dhyān rahe bā’d-e-fanā

mere ham-rāh chale rāh-e-adam meñ mash’al

hazf hoñ mere gunāhān-e-saqīl aur ḳhafīf

aa.eñ mīzāñ meñ jab af’āl-e-sahīh-o-mo’tal

merī shāmat se ho ārāsta gesū-e-siyāh

’āriz-e-shāhid-e-mahshar ho agar husn-e-’amal

saf-e-mehshar meñ tire saath ho terā maddāh

haath meñ ho yahī mastāna qasīda ye ġhazal

kaheñ jibrīl ishāre se ki haañ bismillāh

samt kāshī se chalā jānib-e-mathurā bādal

samt kashi se chala jaanib-e-mathura baadal

barq ke kandhe pe lati hai saba ganga jal

ghar mein ashnan karen sarw-e-qadan-e-gokul

ja ke jamuna pe nahana bhi hai ek tul 'amal

KHabar uDti hui aai hai mahaban mein abhi

ki chale aate hain thirth ko hawa par baadal

tah-o-baala kiye dete hain hawa ke jhonke

beDe bhadon ke nikalte hain bhare ganga jal

kabhi Dubi kabhi uchhli mah-e-nau ki kashti

bahr-e-aKHzar mein talatum se paDi hai halchal

shab-e-daijur andhere mein hai baadal ke nihan

laila-e-mahmil mein hai Dale hue munh par aanchal

aatish-e-gul ka dhuan baam-e-falak par pahuncha

jam gaya manzil-e-KHurshid ki chhat mein kajal

jis taraf se gai bijli phir idhar aa na saki

qila-e-charKH mein hai bhul-bhulayyan baadal

aaina aab tamawwuj se baha jata hai

kahiye taswir se girna na kahin dekh sambhal

aaj ye nushw-o-numa ka hai sitara chamka

shaKH mein kahkashan ki nikal aai kopal

KHizr farmate hain sumbul se teri 'umr-e-draaz

phul se kahte hain phalta rahe gulzar-e-amal

dekhte-dekhte baDh jati hai gulshan ki bahaar

dida-e-nargis-e-shahla ko na samjho ahwal

lahren leta hai jo bijli ke muqabil sabza

charKH par baadala phaila hai zamin par maKHmal

ham-zaban wasf-e-chaman mein hue sab ahl-e-chaman

tutiyon ki hai jo tazmin to bulbul ki ghazal

jugnu phirte hain jo gulbun mein to aati hai nazar

mushaf-e-gul ke hawashi pe tilai jadwal

shaKH par phul hain jumbish mein zamin par sumbul

sab hawa khate hain gulshan mein sawar-o-paidal

aah qumri mein maza aur maze mein tasir

sarw mein dekhiye phul aane lage phul mein phal

KHanda-ha-e-gul-e-qalin se hua shor-e-nushur

kya 'ajab hai jo pareshan hai KHwab-e-maKHmal

shaKH-e-shamshad pe qumri se kaho chheDe malar

naunihaalan-e-gulistan ko sunae ye ghazal

turfa gardish mein giraftar 'ajab pher mein hai

surma hai nind meri dida-e-bedar kharal

samt kashi se gaya jaanib-e-mathura baadal

tairta hai kabhi ganga kabhi jamuna baadal

samt kashi se gaya jaanib-e-mathura baadal

burj mein aaj sar-e-kishn hai kala baadal

shahid-e-gul ka liye sath hai Dola baadal

barq kahti hai mubarak tujhe sehra baadal

kHub chhaya hai sar-e-gokul-o-mathura baadal

rang mein aaj kanhaiya ke hai Duba baadal

sath-e-aflak nazar aati hai ganga-jamuni

rup bijli ka sunahra hai rupahla baadal

charKH par bijli ki chal phir se nazar aata hai

sabza chamkae hilata hua barchha baadal

bijli do chaar qadam chal ke palaT jae na kyun

wo andhera hai ki phirta hai bhaTakta baadal

jab talak burj mein jamuna hai ye khulne ka nahin

hai qasam khae uThae hue ganga baadal

chashma-e-mahr hai aks-e-zar-e-gul se dariya

partaw-e-barq se hai sone ka bajra baadal

meri aankhon mein samata nahin ye josh-o-KHarosh

kisi be-dard ko dikhla ye karishma baadal

tapish-e-dil ka uDaya hua naqsha bijli

chashm-e-pur aab ka dhoya hua KHaka baadal

dil-e-be-tab ki adna si chamak hai bijli

chashm-e-pur-ab ka hai ek karishma baadal

apni kam-zarfiyon se lakh falak par chaDh jae

meri aankhon ka hai utra hua sadqa baadal

kuchh hansi khel nahin joshish-e-girya ka zabt

ye mera dil hai ye mera hai kaleja baadal

raja andar hai pari-kHana-e-mai ka pani

naghma-e-mai ka sar-e-kishn kanhaiya baadal

dekhta gar kahin 'mohsin' ki fughan-o-zari

na garajta kabhi aisa na barasta baadal

phir chala KHama qasida ki taraf ba'd-e-ghazal

ki hai chakkar mein suKHan-go ka dimagh-e-muKHtal

mai-e-gul-rang hai kya sham'-e-shab-e-fikr ka phul

chalte-chalte jo qalam hath se jata hai nikal

hai suKHan-go ko na insha ki na imla ki KHabar

hogai nazm ki insha ki KHabar sab muhmal

dil mein kuchh aur hai par munh se nikalta hai kuchh aur

lafz be-ma'ni hain aur ma'ni hain sab be-aTkal

kitna be-qaid hua kitna ye aawara phira

koi mandir na bacha us se na koi astal

kabhi ganga pe bhaTakta hai kabhi jamuna par

ghaghra par kabhi guzra kabhi su-e-chammal

chhinTe dene se na mahfuz rahi qulzum-o-nil

na bacha KHak uDane se koi dasht-o-jabal

han ye sach hai ki tabi'at ne uDaya jo ghubar

hui aaina-e-mazmun ki do-chandan saiqal

ek zara dekhiye kaifiyat-e-me'araj-e-suKHan

hath mein jam-e-zuhal shisha-e-mah zer-e-baghal

girte paDte kahan mastana kahan rakkha panw

ki tasawwur bhi jahan ja na sake farq ke bal

ya'ni us nur ke maidan mein pahuncha ki jahan

KHirman-e-barq-e-tajalli ka laqab hai baadal

tar-e-baran-e-musalsal hai malaik ka durud

bahr-e-tasbih KHudawand jahan 'azz-o-jal

kahin tuba kahin kausar kahin firdaus-e-barin

kahin bahti hui nahr-e-labn-o-'asal

kahin jibril hukumat pe kahin israfil

kahin rizwan ka kahin saqi-e-kausar ka 'amal

kanz-e-maKHfi ke kisi samt nihan tah-kHane

ek taraf mazhar-e-qudrat ke 'ayan shish-mahal

aashiq-e-jalwa talab-gar kahin chashm-e-qubul

naz-e-mahbub ke parde mein kahin husn-e-'amal

gul-e-be-rangi-e-mutlaq se lahakte gulzar

be-niyazi ke riyahin se mahakte jangal

bagh-e-tanzih mein sarsabz nihaal-e-tashbih

ambiya jis ki hain shaKHen 'urfa hain kopal

gul-e-KHush-rang rasul-e-madani 'arabi

zeb-e-daman-e-abad turra-e-dastar-e-azal

na koi us ka mushabah hai na ham-sar na nazir

na koi us ka mumasil na muqabil na badal

auj-e-rif'at ka qamar naKHl-e-do-'alam ka samar

bahr-e-wahdat ka guhar chashma-kasrat ka kanwal

mehr-e-tauhid ki zau auj-e-sharaf ka mah-e-nau

sham'-e-ijad ki lau bazm-e-risalat ka kanwal

marja'-e-ruh-e-amin zeb-dih 'arsh-e-barin

hami-e-din-e-matin nasiKH-e-adiyan-o-milal

haft-e-'iqlim-e-wilayat mein shah-e-'ali-jah

chaar atraf-e-hidayat mein nabi-e-mursal

ji mein aata hai likhun matla'-e-barjasta agar

wajd mein aa ke qalam hath se jae na uchhal

muntaKHab nusKHa-e-wahdat ka ye tha roz-e-azal

ki na ahmad ka hai sani na ahad ka awwal

daur-e-KHurshid ki bhi hashr mein ho jaegi subh

ta abad dur-e-mohammad ka hai roz-e-awwal

shab-e-isra mein tajalli se ru-e-anwar ki

paD gai gardan-e-zafraf mein sunahri haikal

sajda-e-shukr mein hai nasiya-e-'arsh-e-barin

KHak se pa-e-muqaddas ki laga kar sandal

afzaliyyat pe teri mushtamil aasar-o-kutub

awaliyat pe teri muttafiq adyan-o-milal

lutf se tere hui shaukat-e-iman mohkam

qahr se saltanat-e-kufar hui mustasil

jis taraf hath baDhin kufr ke chhaT jaen qadam

jis jagah panw rakhen sajda karen lat-o-hubal

ho saka hai kahin mahbub-e-KHuda ghair-e-KHuda

ek zara dekh samajh kar mari chashm-e-ahwal

raf’ hone ka na tha wahdat-o-kasrat ka KHilaf

mim ahmad ne kiya aa ke ye qissa faisal

nazar aae mujhe ahmad mein agar dal-e-dui

roz-e-mahshar hun ilahi meri aankhen ahwal

phir usi tarz ki mushtaq hai mawwaji-e-tab’

ki hai us bahr mein ek qafiya achchha baadal

kya jhuka ka'be ki jaanib ko hai qibla baadal

sajde karata hai su-e-taiba-o-bataha baadal

chhoD kar but-kada-e-hind-o-sanam-kHana-e-burj

aaj ka’ba mein bichhae hai musalla baadal

sabza-e-charKH ko andhyari laga kar laya

shahsawar-e-’arabi ke liye kala baadal

bahr-e-imka۔n mein rasul-e-’arabi durr-e-yatim

rahmat-e-KHas KHudawand-e-ta'ta baadal

qibla-e-ahl-e-nazar ka'ba-e-abru-e-huzur

mu-e-sar qible ko ghere hue kala baadal

rashk se shoala-e-ruKHsar ke roti hai baraq

barq ke munh pe rakkhe hue palla baadal

dur pahunchi lab-e-jaan-baKHsh-e-nabi ki shohrat

sun zara kahte hain kya hazrat-e-isai baadal

chashm-e-insaf se dekh aap ke dandan-e-sharif

durr-e-yakta hai tera garche yagana baadal

tha bandha tar farishton ka dar-e-aqdas par

shab-e-me’araj mein tha 'arsh-e-mu'alla baadal

aamad-o-raft mein tha ham-qadam-e-barq burraq

murgh-zar-e-chaman-e-’alam-e-baala baadal

haf-iqlim mein us din ka baja hai Danka

tha teri aam risalat ka garajta baadal

aastane ka tere dahr mein wo rutba hai

ki jo nikla to jhukae hue kandha baadal

tu wo faiyyaz hai dar par tere sail ki tarah

falak-e-pir ko laya diye kandha baadal

tegh-e-maidan-e-shuja’at mein chamakti bijli

hath gulzar-e-saKHawat mein barasta baadal

'mohsin' ab kijiye gulzar-e-munajat ki sair

ki ijabat ka chala aata hai gahira baadal

sab se ’ala teri sarkar hai sab se afzal

mere iman-e-mufassal ka yahi hai mujmal

hai tamanna ki rahe na’t se teri KHali

na mera sher na qita na qasida na ghazal

din-o-duniya mein kisi ka na sahaara ho mujhe

sirf tera hi bharosa teri quwwat tera bal

ho mera resha-e-ummid wo naKHl-e-sarsabz

jis ki har shaKH mein ho phul har ek phul mein phal

aarzu hai ki tera dhyan rahe ta-dam-e-marg

shakl teri nazar aae mujhe jab aae ajal

ruh se meri kahin pyar se yun 'izrail

ki meri jaan madine ko jo chalti hai to chal

dam-e-murdan ye ishaara ho shafaat ka teri

fikr-e-farda tu na kar dekh liya jaega kal

yaad-e-aina-e-ruKHsar se hairat ho mujhe

gosha-e-qabr nazar aae mujhe shish-mahal

mezban ban ke nakirain kahen ghar hai tera

na uThana koi taklif na hona bekal

ruKH-e-anwar ka tere dhyan rahe ba’d-e-fana

mere ham-rah chale rah-e-adam mein mash’al

hazf hon mere gunahan-e-saqil aur KHafif

aaen mizan mein jab af’al-e-sahih-o-mo’tal

meri shamat se ho aarasta gesu-e-siyah

’ariz-e-shahid-e-mahshar ho agar husn-e-’amal

saf-e-mehshar mein tere sath ho tera maddah

hath mein ho yahi mastana qasida ye ghazal

kahen jibril ishaare se ki han bismillah

samt kashi se chala jaanib-e-mathura baadal