na hui phir kisi aashiq pe jafa mere baad

na huī phir kisī āshiq pe jafā mere ba.ad

ban ga.e dast-e-sitam dast-e-duā mere ba.ad

kHāna-e-dahr meñ vo ahsan-e-taqvīm huuñ maiñ

merī sūrat kā bhī naqsha nā khiñchā mere ba.ad

jab talak merī ḳhudī baaqī rahī sab kuchh thā

rah gayā phir to faqat nām-e-ḳhudā mere ba.ad

aap nāyāb ho mujh ko bhī ġhanīmat samjho

dekho pachhtāoge ai māh-e-laqā mere ba.ad

ham vahī the jo huā karte the pāmāl-o-kHirām

na jamā ḳhaak pe naqsh-e-kaf-e-pā mere ba.ad

mujh se avval na thā kuchh dahr meñ juz zāt-e-ḳhudā

ġhair-e-haq dekhā to phir kuchh na rahā mere ba.ad

ai sanam banda ke dam se hai ḳhudā.ī terī

tujh ko bhī koī kahegā na ḳhudā mere ba.ad

dām-e-zīst meñ karatā rahā dil meñ pinhāñ

khul gayā phir na mirā bhed chhupā mere ba.ad

mere hī saath merī nasl bhī duniyā se uThī

lillāhil-hamd nasab bhī na chalā mere ba.ad

jiite jī mujh pe na zāhir ye huā maiñ kyā huuñ

kyā huā kahiye jo uqda ye khulā mere ba.ad

'ulvī' āzādī-o-gum-nāmī ise kahte haiñ

ki mirā nām-o-nishāñ kuchh na rahā mere ba.ad

na hui phir kisi aashiq pe jafa mere baad

ban gae dast-e-sitam dast-e-dua mere baad

kHana-e-dahr mein wo ahsan-e-taqwim hun main

meri surat ka bhi naqsha na khincha mere baad

jab talak meri KHudi baqi rahi sab kuchh tha

rah gaya phir to faqat nam-e-KHuda mere baad

aap nayab ho mujh ko bhi ghanimat samjho

dekho pachhtaoge ai mah-e-laqa mere baad

hum wahi the jo hua karte the pamal-o-kHiram

na jama KHak pe naqsh-e-kaf-e-pa mere baad

mujh se awwal na tha kuchh dahr mein juz zat-e-KHuda

ghair-e-haq dekha to phir kuchh na raha mere baad

ai sanam banda ke dam se hai KHudai teri

tujh ko bhi koi kahega na KHuda mere baad

dam-e-zist mein karata raha dil mein pinhan

khul gaya phir na mera bhed chhupa mere baad

mere hi sath meri nasl bhi duniya se uThi

lillahil-hamd nasab bhi na chala mere baad

jite ji mujh pe na zahir ye hua main kya hun

kya hua kahiye jo uqda ye khula mere baad

'ulwi' aazadi-o-gum-nami ise kahte hain

ki mera nam-o-nishan kuchh na raha mere baad