fana par etibar-e-zindagi mushkil samajhta hun

fanā par e'tibār-e-zindagī mushkil samajhtā huuñ

vahāñ madfan nikaltā hai jahāñ mahfil samajhtā huuñ

nahufta ḳhāk-e-mahfil meñ bhī ik mahfil samajhtā huuñ

har ik zarre ko ik manzil-rsīda dil samajhtā huuñ

mohabbat dil ko maare yā jilā.e haq-ba-jānib hai

mohabbat hī ko maiñ parvardigār-e-dil samajhtā huuñ

hazāroñ manzileñ tai kar chukā ab apnī hastī ko

ba-qadr-e-har-nafs āsūda-e-manzil samajhtā huuñ

vahī sab se baḌī ne.amat hai jo mil jaa.e be-māñge

sukūn-e-dil se behtar iztirāb-e-dil samajhtā huuñ

harīm-e-husn firdaus-e-mohabbat ka'ba-e-fitrat

ḳhudā jaane vo kyā kyā hai jise maiñ dil samajhtā huuñ

pa-e-takmīl ai 'sīmāb' aa.e ahl-e-dil koī

maiñ duniyā ko hadīs-e-nā-tamām-e-dil samajhtā huuñ

fana par e'tibar-e-zindagi mushkil samajhta hun

wahan madfan nikalta hai jahan mahfil samajhta hun

nahufta KHak-e-mahfil mein bhi ek mahfil samajhta hun

har ek zarre ko ek manzil-rsida dil samajhta hun

mohabbat dil ko mare ya jilae haq-ba-jaanib hai

mohabbat hi ko main parwardigar-e-dil samajhta hun

hazaron manzilen tai kar chuka ab apni hasti ko

ba-qadr-e-har-nafs aasuda-e-manzil samajhta hun

wahi sab se baDi neamat hai jo mil jae be-mange

sukun-e-dil se behtar iztirab-e-dil samajhta hun

harim-e-husn firdaus-e-mohabbat ka'ba-e-fitrat

KHuda jaane wo kya kya hai jise main dil samajhta hun

pa-e-takmil ai 'simab' aae ahl-e-dil koi

main duniya ko hadis-e-na-tamam-e-dil samajhta hun