nazar ki manzil-e-maqsud mehr-o-mah nahin

nazar kī manzil-e-maqsūd mehr-o-māh nahīñ

ye jalva-gāh ke parde haiñ jalva-gāh nahīñ

balā se abrū huā par jo dastgāh nahīñ

ḳhudā kā shukr yahāñ qaht-e-ashk-e-vāh nahīñ

ḳhayāl-e-dair nahīñ ḳhauf-e-ḳhānqāh nahīñ

maiñ jāntā huuñ mohabbat kahīñ gunāh nahīñ

jo ek nuqta pe jam jaa.e vo nigāh nahīñ

nigāh vo hai jo pāband-e-jalva-gāh nahīñ

miTā ke apnī ḳhudī mā-sivā se kar inkār

sukūn-e-rūh ba-juz zikr-e-lā-ilāh nahīñ

alag hai sab se mirā jāda-e-sukHan 'sīmāb'

avaam jis ke haiñ pairav vo merī raah nahīñ

nazar ki manzil-e-maqsud mehr-o-mah nahin

ye jalwa-gah ke parde hain jalwa-gah nahin

bala se abru hua par jo dastgah nahin

KHuda ka shukr yahan qaht-e-ashk-e-wah nahin

KHayal-e-dair nahin KHauf-e-KHanqah nahin

main jaanta hun mohabbat kahin gunah nahin

jo ek nuqta pe jam jae wo nigah nahin

nigah wo hai jo paband-e-jalwa-gah nahin

miTa ke apni KHudi ma-siwa se kar inkar

sukun-e-ruh ba-juz zikr-e-la-ilah nahin

alag hai sab se mera jada-e-sukHan 'simab'

awam jis ke hain pairaw wo meri rah nahin