ai fitrat-e-awara ai jalwa-e-harjai

ai fitrat-e-āvāra ai jalva-e-harjā.ī

kyā ilm meñ hai tere merā ġham-e-tanhā.ī

itnī to kashish farmā ai sho'la-e-sīnā.ī

ḳhākistar-e-mūsā phir lene lage añgḌā.ī

phir tere tabassum kī nazreñ haiñ tamannā.ī

vo muntaḳhab ik ishva min-jumla-e-rā'nā.ī

haiñ ishq ke do naġhme bustānī-e-sahrā.ī

royā to ghaTā uTThī gaayā to bahār aa.ī

jalvoñ kī to 'ādat hai mahjūb-e-nazar rahnā

kuchh tujh meñ bhī jur.at hai ai chashm-e-tamāshā.ī

ik umr huī hairāñ huuñ tere tajassus meñ

rahne bhī de bas apnī ye anjuman-ārā.ī

jab se mujhe mahviyat hai tere tasavvur meñ

āsūda-e-jalvat huuñ be-minnat-e-tanhā.ī

dīvānoñ kī tere hai pāband havā-e-gul

zanjīr baḌhāne ko uTThe ki bahār aa.ī

'sīmāb' ġhazal-goī ab us ke sivā kyā hai

be-fasl kā ik naġhma be-vaqt kī shahnā.ī

ai fitrat-e-awara ai jalwa-e-harjai

kya ilm mein hai tere mera gham-e-tanhai

itni to kashish farma ai sho'la-e-sinai

KHakistar-e-musa phir lene lage angDai

phir tere tabassum ki nazren hain tamannai

wo muntaKHab ek ishwa min-jumla-e-ra'nai

hain ishq ke do naghme bustani-e-sahrai

roya to ghaTa uTThi gaya to bahaar aai

jalwon ki to 'adat hai mahjub-e-nazar rahna

kuchh tujh mein bhi jurat hai ai chashm-e-tamashai

ek umr hui hairan hun tere tajassus mein

rahne bhi de bas apni ye anjuman-arai

jab se mujhe mahwiyat hai tere tasawwur mein

aasuda-e-jalwat hun be-minnat-e-tanhai

diwanon ki tere hai paband hawa-e-gul

zanjir baDhane ko uTThe ki bahaar aai

'simab' ghazal-goi ab us ke siwa kya hai

be-fasl ka ek naghma be-waqt ki shahnai