tu ne mai-KHana nigahon mein chhupa rakkha hai

tū ne mai-ḳhāna nigāhoñ meñ chhupā rakkhā hai

hosh vāloñ ko bhī dīvāna banā rakkhā hai

ab yaqīnan mujhe me'arāj-e-mohabbat hogī

merā sar aap ke qadmoñ meñ jhukā rakkhā hai

har tamannā ko kaleja se lagā rakkhā hai

dil meñ terī hī mohabbat ko chhupā rakhā hai

har qadam sajda ba-sad shoḳh kiyā karatā huuñ

maiñ ne kā'ba tere kūche meñ banā rakkhā hai

naaz kaise na karūñ banda-navāzī pe tirī

mujh se nāchīz ko jab apnā banā rakkhā hai

jo bhī ġham miltā hai siine se lagā letā huuñ

maiñ ne har dard ko taqdīr banā rakkhā hai

ye tirī banda-navāzī ye karam hai terā

mujh gunahgār ke ’aiboñ ko chhupā rakkhā hai

jab bhī dekhā tumheñ maḳhmūr hī dekhā maiñ ne

jaane kyā aap ne sālik ko pilā rakkhā hai

tu ne mai-KHana nigahon mein chhupa rakkha hai

hosh walon ko bhi diwana bana rakkha hai

ab yaqinan mujhe me'araj-e-mohabbat hogi

mera sar aap ke qadmon mein jhuka rakkha hai

har tamanna ko kaleja se laga rakkha hai

dil mein teri hi mohabbat ko chhupa rakha hai

har qadam sajda ba-sad shoKH kiya karata hun

main ne ka'ba tere kuche mein bana rakkha hai

naz kaise na karun banda-nawazi pe teri

mujh se nachiz ko jab apna bana rakkha hai

jo bhi gham milta hai sine se laga leta hun

main ne har dard ko taqdir bana rakkha hai

ye teri banda-nawazi ye karam hai tera

mujh gunahgar ke ’aibon ko chhupa rakkha hai

jab bhi dekha tumhein maKHmur hi dekha main ne

jaane kya aap ne salik ko pila rakkha hai