mirā sar kaT ke maqtal meñ gire qātil ke qadmoñ par
dam-e-āḳhir adā yuuñ sajda-e-shukrāna ho jaa.e
mera sar kaT ke maqtal mein gire qatil ke qadmon par
dam-e-aKHir ada yun sajda-e-shukrana ho jae
ishq meñ āshiq kī ye me.arāj hai
qatl ho qātil kā muñh dekhā kare
ishq mein aashiq ki ye mearaj hai
qatl ho qatil ka munh dekha kare
qātil ko hai zo'm-e-chāra-garī dard-e-nihāñ kī ḳhair nahīñ
vo mujh pe karam farmāne lage shāyad mirī jaañ kī ḳhair nahīñ
qatil ko hai zo'm-e-chaara-gari dard-e-nihan ki KHair nahin
wo mujh pe karam farmane lage shayad meri jaan ki KHair nahin
sadqe ai qātil tire mujh tishna-e-dīdār kī
tishnagī jaatī rahī āb-e-dam-e-shamshīr se
sadqe ai qatil tere mujh tishna-e-didar ki
tishnagi jati rahi aab-e-dam-e-shamshir se
qātil rahbar qātil rahzan
dil sā dost na dil sā dushman
qatil rahbar qatil rahzan
dil sa dost na dil sa dushman
chhurī bhī tez zālim ne na kar lī
baḌā be-rahm hai qātil hamārā
chhuri bhi tez zalim ne na kar li
baDa be-rahm hai qatil hamara
kahāñ kā naala kahāñ kā shevan sunā.e qātil hai vaqt-e-murdan
qalam huī hai badan se gardan zabāñ pe na.ara hai āfrīñ kā
kahan ka nala kahan ka shewan sunae qatil hai waqt-e-murdan
qalam hui hai badan se gardan zaban pe nara hai aafrin ka
tirī āmādgī qātil tabassum hai mohabbat kā
tavajjoh gar nahīñ muzmar to qasd-e-imtihāñ kyuuñ ho
teri aamadgi qatil tabassum hai mohabbat ka
tawajjoh gar nahin muzmar to qasd-e-imtihan kyun ho
qātil ne pā.emāl kiyā jab se ḳhūn-e-'ishq'
sab shaġhl chhoḌ kar vo huā hai hinā-parast
qatil ne paemal kiya jab se KHun-e-'ishq'
sab shaghl chhoD kar wo hua hai hina-parast
haiñ shauq-e-zab.h meñ āshiq taḌapte murġh-e-bismil se
ajal to hai zarā kah aanā ye paiġhām qātil se
hain shauq-e-zabh mein aashiq taDapte murgh-e-bismil se
ajal to hai zara kah aana ye paigham qatil se
hai vo qātil qatl-e-āshiq par khaḌā
maar degā ḳhuuñ bharī talvār se
hai wo qatil qatl-e-ashiq par khaDa
mar dega KHun bhari talwar se
nikaltī hai sadā.eñ marhabā har zaḳhm se qātil
hameñ lazzat milī kyā jaane kyā shauq-e-shahādat meñ
nikalti hai sadaen marhaba har zaKHm se qatil
hamein lazzat mili kya jaane kya shauq-e-shahadat mein
adā-o-nāz-e-qātil huuñ kabhī andāz-e-bismil huuñ
kahīñ maiñ ḳhanda-e-gul huuñ kahīñ soz-e-anādil huuñ
ada-o-naz-e-qatil hun kabhi andaz-e-bismil hun
kahin main KHanda-e-gul hun kahin soz-e-anadil hun
tishna-lab chhoḌā mujhe qātil ne vaqt-e-imtihāñ
ruuh merī āb-e-ḳhanjar ko tarastī rah ga.ī
tishna-lab chhoDa mujhe qatil ne waqt-e-imtihan
ruh meri aab-e-KHanjar ko tarasti rah gai
vāh-re shauq-e-shahādat kū-e-qātil kī taraf
gungunātā raqs kartā jhūmtā jaatā huuñ maiñ
wah-re shauq-e-shahadat ku-e-qatil ki taraf
gungunata raqs karta jhumta jata hun main
maiñ kyā bevafā huuñ ki mahshar meñ qātil ḳhudā se karūñ shikva-e-qatl apnā
zamāna kahe ḳhūn-e-nāhaq bahāyā agar mujh se pūchhā to paanī kahūñgā
main kya bewafa hun ki mahshar mein qatil KHuda se karun shikwa-e-qatl apna
zamana kahe KHun-e-nahaq bahaya agar mujh se puchha to pani kahunga
miyān-e-tishnagī pyāsoñ ne aisī lazzateñ lūTīñ
ki āb-e-teġh-e-qātil be-mazā ma.alūm hotā hai
miyan-e-tishnagi pyason ne aisi lazzaten luTin
ki aab-e-tegh-e-qatil be-maza malum hota hai
ye bhī ik Dar hai kahīñ rusvā na ho qātil mirā
hashr meñ ḳhūn-e-tamannā kā agar da.avā karūñ
ye bhi ek Dar hai kahin ruswa na ho qatil mera
hashr mein KHun-e-tamanna ka agar dawa karun
nikāle hausle maqtal meñ apne bismil ke
nisār teġh ke qurbān aise qātil ke
nikale hausle maqtal mein apne bismil ke
nisar tegh ke qurban aise qatil ke
mire qātil kī jaldī ne mujhe nākām hī rakhā
tamannā dekhne kī bhī na niklī tez-dastī meñ
mere qatil ki jaldi ne mujhe nakaam hi rakha
tamanna dekhne ki bhi na nikli tez-dasti mein
imtihāñ-gāh-e-vafā meñ tū bhī chal maiñ bhī chalūñ
aaj ai shamshīr-e-qātil maiñ nahīñ yā tū nahīñ
imtihan-gah-e-wafa mein tu bhi chal main bhi chalun
aaj ai shamshir-e-qatil main nahin ya tu nahin
udhar har vaar par qātil ko barsoñ lutf aayā hai
idhar har zaḳhm ne dī hai sadā-e-āfrīñ barsoñ
udhar har war par qatil ko barson lutf aaya hai
idhar har zaKHm ne di hai sada-e-afrin barson
jis taraf kūcha-e-qātil meñ guzar hotā hai
nazar aate haiñ udhar maut ke sāmāñ mujh ko
jis taraf kucha-e-qatil mein guzar hota hai
nazar aate hain udhar maut ke saman mujh ko
qātil vo shāḳh hai tirī ye teġh-e-ābdār
jis ko na gul kā ġham hai na hājat samar kī hai
qatil wo shaKH hai teri ye tegh-e-abdar
jis ko na gul ka gham hai na hajat samar ki hai
kūcha-e-qātil meñ mujhko ghair kar laa.ī hai ye
jiite jī jannat meñ pahuñchā de qazā aisī to ho
kucha-e-qatil mein mujhko ghair kar lai hai ye
jite ji jannat mein pahuncha de qaza aisi to ho
na hotī dil meñ ulfat apnī kyuuñ qātil ke abrū kī
ki mujh ko to qatīl-e-ḳhanjar-e-saffāk honā thā
na hoti dil mein ulfat apni kyun qatil ke abru ki
ki mujh ko to qatil-e-KHanjar-e-saffak hona tha
dar pe lagvātā hai gar apne shahīdoñ kī sabīl
to phir ai qātil lagā tū āb-ḳhoroñ ko hinā
dar pe lagwata hai gar apne shahidon ki sabil
to phir ai qatil laga tu aab-KHoron ko hina
qad-e-ḳham hai garebāñ-gīr kanThā ban ke qātil kā
magar be-tābī-e-zauq-e-shahādat ho to aisī ho
qad-e-KHam hai gareban-gir kanTha ban ke qatil ka
magar be-tabi-e-zauq-e-shahadat ho to aisi ho
ḳhūn-e-ushshāq se qātil ne na khelī holī
saf-e-maqtal meñ kabhī rañg uchhalne na diyā
KHun-e-ushshaq se qatil ne na kheli holi
saf-e-maqtal mein kabhi rang uchhalne na diya
nahīñ hai ye qātil taġhāful kā vaqt
ḳhabar le ki baaqī abhī jaan hai
nahin hai ye qatil taghaful ka waqt
KHabar le ki baqi abhi jaan hai
koī mar kar to dekhe imtihāñ-gāh-e-mohabbat meñ
ki zer-e-ḳhanjar-e-qātil hayāt-e-jāvedāñ tak hai
koi mar kar to dekhe imtihan-gah-e-mohabbat mein
ki zer-e-KHanjar-e-qatil hayat-e-jawedan tak hai
is darja pashemāñ mirā qātil hai ki us se
mahshar meñ mire sāmne aayā nahīñ jaatā
is darja pasheman mera qatil hai ki us se
mahshar mein mere samne aaya nahin jata
mar hī ga.e jafāoñ se qātil taḌap-taḌap
maiñ kyā ki aur kitne hī bismil taḌap-taḌap
mar hi gae jafaon se qatil taDap-taDap
main kya ki aur kitne hi bismil taDap-taDap
sikhā.ī naaz ne qātil ko bedardī kī ḳhū barsoñ
rahī betāb siina meñ hamārī aarzū barsoñ
sikhai naz ne qatil ko bedardi ki KHu barson
rahi betab sina mein hamari aarzu barson
chāTtī hai kyuuñ zabān-e-teġh-e-qātil baar baar
be-namak chhiḌke ye zaḳhmoñ meñ mazā kyūñkar huā
chaTti hai kyun zaban-e-tegh-e-qatil bar bar
be-namak chhiDke ye zaKHmon mein maza kyunkar hua
saḳht-jāñ 'sanjar' huā hai ishq meñ
teġh ab qātil kī ḳhālī jā.egī
saKHt-jaan 'sanjar' hua hai ishq mein
tegh ab qatil ki KHali jaegi
jo azm-e-qatl hai āñkhoñ pe paTTī bāñdh lī qātil
mabādā tujh ko rahm aa jaa.e merī nā-tavānī par
jo azm-e-qatl hai aankhon pe paTTi bandh li qatil
mabaada tujh ko rahm aa jae meri na-tawani par
vahm hai yā saham hai qātil ko yā merā ḳhayāl
haath kāñpe jaate haiñ ḳhanjar ravāñ hotā nahīñ
wahm hai ya saham hai qatil ko ya mera KHayal
hath kanpe jate hain KHanjar rawan hota nahin
adā ġhamze karishme ishve haiñ bikhre hue har-sū
saf-e-maqtal meñ yā qātil hai yā andāz-e-qātil hai
ada ghamze karishme ishwe hain bikhre hue har-su
saf-e-maqtal mein ya qatil hai ya andaz-e-qatil hai
nahīñ mauqūf duniyā hī meñ charchā ḳhūn-e-nāhaq kā
sar-e-mahshar bhī qātil ko pashemāñ kar ke chhoḌūñgā
nahin mauquf duniya hi mein charcha KHun-e-nahaq ka
sar-e-mahshar bhi qatil ko pasheman kar ke chhoDunga
saḳht-jānī se galā kaTtā nahīñ
e'tibār-e-ḳhanjar-e-qātil gayā
saKHt-jaani se gala kaTta nahin
e'tibar-e-KHanjar-e-qatil gaya
ye haiñ ḳhūn-e-bismil kī dhāreñ ai qātil
tirī āñkhoñ meñ surḳh Dore nahīñ haiñ
ye hain KHun-e-bismil ki dhaaren ai qatil
teri aankhon mein surKH Dore nahin hain
ḳhūn-e-nāhaq kī shahādat ke liye kaafī hai ye
dāman-e-qātil pe jo dhabbe lahū ke jam rahe
KHun-e-nahaq ki shahadat ke liye kafi hai ye
daman-e-qatil pe jo dhabbe lahu ke jam rahe
'ārifā' qātil jab aayā teġh-e-vahdat haath le
qatl ko gardan jhukā maiñ peshtar hone lagā
'arifa' qatil jab aaya tegh-e-wahdat hath le
qatl ko gardan jhuka main peshtar hone laga
āstīñ rañg badle aa.ī lahū de niklī
na chhupā laakh chhupā hashr meñ qātil merā
aastin rang badle aai lahu de nikli
na chhupa lakh chhupa hashr mein qatil mera
hai maqtal meñ qātil ke ik vaar kā
kalejā huā sar huā dil judā
hai maqtal mein qatil ke ek war ka
kaleja hua sar hua dil juda
kar ke da.avā ḳhūn-e-nāhaq kā bahut nādim huā
arsa-e-mahshar meñ qātil ko pareshāñ dekh kar
kar ke dawa KHun-e-nahaq ka bahut nadim hua
arsa-e-mahshar mein qatil ko pareshan dekh kar
