इक गोपाल संग मम जाई । बस्यो नृपति ह्वै सोइ पुर छाई ।।

इक गोपाल संग मम जाई । बस्यो नृपति ह्वै सोइ पुर छाई ।।

हम कहँ छौंड़ि भयो सो न्यारे । ताही बिनु सब भये दुखारे ।।

तुम लशकरिये भूप उदारा । कत पूछत हम जात गँवारा ।।

सुनि यादव कछु मन बिहँसाना । तुम ब्रजवासी हौ हम जाना ।।

जिनको तुम भाषत गोपाला । उनहीं को यह कटक रिसाला ।।

अब दुख मेटहु भेंटहु तिनते । गयो ग्वाल हरि-कटकहि सुनते ।।

तिनकहँ आगम सगुन बनायो । कछु अनंद ह्वै है मन आयो ।।

ग्वालहिं आवत रहे निहारी । गदगद कठ न सकत सँभारी ।।

दूरहिं ते बोल्यो गोपाला । मनमोहन आये नँदलाला ।।

जिन बिन सब ब्रज भये दुखारे । त आये इहँ प्रान-पियारे ।।

सुनि गोपिन नहिं परत पत्यारो । कहँ ऐसो है पुण्य हमारो ।।

सुनत नंद-नैनन जल छाये । ऐसे भाग कहाँ हम पाये ।।

लोग लोग सब पूछत सारे । कहँ उतरे प्राणन के प्यारे ।।

सुनतहिं यशुमति ह्वै गई बौरी । ता ग्वालहिं पूछत उठि दौरी ।।

आये श्याम सत्य कहु भैया । मोहिं दिखावहु नेक कन्हैया ।।

निज लालन को कंठ लगाऊँ । दुसह विरह को ताप नसाऊँ ।।

कह अब गहरु करत वेकाजहि । भेंटहु वेगि सकल ब्रजराजहि ।।

तब ऐसे भाष्यो नँदराइ । अब हरि होंहि न ब्रज की नाईं ।।

माणिन खचित बैठत सिंहासन । चँवर छत्र कर गहे खवासन ।।

अतिहि भीर नृप वास न पावें । द्वारहि ते बहु फिरि फिरि जावें ।।

छत्रपतिहि छरियन विलगावत । तहँ हमसब की कौन चलावत ।।

छपन कोटि यदु छाड़ि सगाते । क्यों मानै धायन के नाते ।।

कोउ कह ऐसे कैसे जैहैं। हमकहु लखि हरिमनहिं लजैहैं ।।

कोउ कह मणि आभूषण पहिरे । अंबर वर विचित्र रँग गहिरे ।।

कोउ कह हम तो ऐसहि जाहीं । अब तो कछु बनिआवत नाहीं ।।

हरि को देखि परम सुख पैहैं । ता अनुचर कर मारहु खैहैं ।।

कोउ कह हम नीके भुज परि हैं । भे राजा तो का धौं करि हैं ।।

करत मनोरथ कोउ मन माही । कोऊ खोज लेन उठि जाहीं ।।

कहत परस्पर मुदित गुवाला । अब तो फिरि आये गोपाला ।।

इक कह अब गोकुल लै जैहैं । हमते बहुरि जान कहँ पैहैं ।।

कोउ नाचत है दै कर तारी । बहुविधि करत कुलाहल भारी ।।

एक एकन ते देत बधाई । मानहुँ सबन गई निधि पाई ।।