aaj kya haal hai yarab sar-e-mahfil mera

aaj kyā haal hai yārab sar-e-mahfil merā

ki nikāle liye jaatā hai koī dil merā

soz-e-ġham dekh na barbād ho hāsil merā

dil kī tasvīr hai har ā.īna-e-dil merā

sub.h tak hijr meñ kyā jāniye kyā hotā hai

shaam hī se mire qaabū meñ nahīñ dil merā

mil ga.ī ishq meñ īzā-talabī se rāhat

ġham hai ab jaan mirī dard hai ab dil merā

paayā jaatā hai tirī shoḳhi-e-raftār kā rañg

kaash pahlū meñ dhaḌaktā hī rahe dil merā

haa.e us mard kī qismat jo huā dil kā sharīk

haa.e us dil kā muqaddar jo banā dil merā

kuchh khaTaktā to hai pahlū meñ mire rah rah kar

ab ḳhudā jaane tirī yaad hai yā dil merā

aaj kya haal hai yarab sar-e-mahfil mera

ki nikale liye jata hai koi dil mera

soz-e-gham dekh na barbaad ho hasil mera

dil ki taswir hai har aaina-e-dil mera

subh tak hijr mein kya jaaniye kya hota hai

sham hi se mere qabu mein nahin dil mera

mil gai ishq mein iza-talabi se rahat

gham hai ab jaan meri dard hai ab dil mera

paya jata hai teri shoKHi-e-raftar ka rang

kash pahlu mein dhaDakta hi rahe dil mera

hae us mard ki qismat jo hua dil ka sharik

hae us dil ka muqaddar jo bana dil mera

kuchh khaTakta to hai pahlu mein mere rah rah kar

ab KHuda jaane teri yaad hai ya dil mera