aankhon ka tha qusur na dil ka qusur tha

āñkhoñ kā thā qusūr na dil kā qusūr thā

aayā jo mere sāmne merā ġhurūr thā

tārīk misl-e-āh jo āñkhoñ kā nuur thā

kyā sub.h hī se shām-e-balā kā zuhūr thā

vo the na mujh se duur na maiñ un se duur thā

aatā na thā nazar to nazar kā qusūr thā

har vaqt ik ḳhumār thā har dam surūr thā

botal baġhal meñ thī ki dil-e-nā-subūr thā

koī to dardmand-e-dil-e-nā-subūr thā

maanā ki tum na the koī tum sā zarūr thā

lagte hī Thes TuuT gayā sāz-e-ārzū

milte hī aañkh shīsha-e-dil chuur chuur thā

aisā kahāñ bahār meñ rañgīniyoñ kā josh

shāmil kisī kā ḳhūn-e-tamannā zarūr thā

saaqī kī chashm-e-mast kā kyā kījiye bayān

itnā surūr thā ki mujhe bhī surūr thā

palTī jo rāste hī se ai āh-e-nā-murād

ye to batā ki bāb-e-asar kitnī duur thā

jis dil ko tum ne lutf se apnā banā liyā

us dil meñ ik chhupā huā nashtar zarūr thā

us chashm-e-mai-farosh se koī na bach sakā

sab ko ba-qadr-e-hausla-e-dil surūr thā

dekhā thā kal 'jigar' ko sar-e-rāh-e-mai-kada

is darja pī gayā thā ki nashshe meñ chuur thā

aankhon ka tha qusur na dil ka qusur tha

aaya jo mere samne mera ghurur tha

tarik misl-e-ah jo aankhon ka nur tha

kya subh hi se sham-e-bala ka zuhur tha

wo the na mujh se dur na main un se dur tha

aata na tha nazar to nazar ka qusur tha

har waqt ek KHumar tha har dam surur tha

botal baghal mein thi ki dil-e-na-subur tha

koi to dardmand-e-dil-e-na-subur tha

mana ki tum na the koi tum sa zarur tha

lagte hi Thes TuT gaya saz-e-arzu

milte hi aankh shisha-e-dil chur chur tha

aisa kahan bahaar mein ranginiyon ka josh

shamil kisi ka KHun-e-tamanna zarur tha

saqi ki chashm-e-mast ka kya kijiye bayan

itna surur tha ki mujhe bhi surur tha

palTi jo raste hi se ai aah-e-na-murad

ye to bata ki bab-e-asar kitni dur tha

jis dil ko tum ne lutf se apna bana liya

us dil mein ek chhupa hua nashtar zarur tha

us chashm-e-mai-farosh se koi na bach saka

sab ko ba-qadr-e-hausla-e-dil surur tha

dekha tha kal 'jigar' ko sar-e-rah-e-mai-kada

is darja pi gaya tha ki nashshe mein chur tha