vo sar-e-bām kab nahīñ aatā
jab maiñ hotā huuñ tab nahīñ aatā
bahr-e-taskīñ vo kab nahīñ aatā
e'tibār-e-āh ab nahīñ aatā
chup hai shikvoñ kī ek band kitāb
us se kahne kā Dhab nahīñ aatā
un ke aage bhī dil ko chain nahīñ
be-adab ko adab nahīñ aatā
zaḳhm se kam nahīñ hai us kī hañsī
jis ko ronā bhī ab nahīñ aatā
muñh ko aa jaatā hai jigar ġham se
aur gila tā-ba-lab nahīñ aatā
bhūlī bātoñ pe terī dil ko yaqīñ
pahle aatā thā ab nahīñ aatā
dukh vo detā hai us pe hai ye haal
lene jaatā huuñ jab nahīñ aatā
'ārzū' be-asar mohabbat chhoḌ
kyuuñ kare kaam jab nahīñ aatā
wo sar-e-baam kab nahin aata
jab main hota hun tab nahin aata
bahr-e-taskin wo kab nahin aata
e'tibar-e-ah ab nahin aata
chup hai shikwon ki ek band kitab
us se kahne ka Dhab nahin aata
un ke aage bhi dil ko chain nahin
be-adab ko adab nahin aata
zaKHm se kam nahin hai us ki hansi
jis ko rona bhi ab nahin aata
munh ko aa jata hai jigar gham se
aur gila ta-ba-lab nahin aata
bhuli baaton pe teri dil ko yaqin
pahle aata tha ab nahin aata
dukh wo deta hai us pe hai ye haal
lene jata hun jab nahin aata
'arzu' be-asar mohabbat chhoD
kyun kare kaam jab nahin aata
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
