hum aaj khaenge ek tir imtihan ke liye

ham aaj khā.eñge ik tiir imtihāñ ke liye

ki vaqf karnā hai dil-e-nāz jāñ-sitāñ ke liye

jalā ke dil ko lapak se Daro na sho.ale kī

zabāñ-darāz hai lekin nahīñ fuġhāñ ke liye

usī chaman meñ ki vus'at hai jis kī nā-mahdūd

nahīñ panāh kī jā ek āshiyāñ ke liye

kiyā thā zabt ne da.avā rāz-dār-e-'ishq

uThā hai dard kaleje meñ imtihāñ ke liye

kisī ko DhūñDhe na miltā nazar kī choT kā mail

na hotā dil meñ suvaidā agar nishāñ ke liye

sivā.e dil ke jo sarmāya-e-do 'ālam hai

na kuchh yahāñ ke liye hai na kuchh vahāñ ke liye

na 'ishq jurm hai koī na dil kī baat hai raaz

burā ho sharm kā ik qufl hai zabāñ ke liye

ḳhilāf apne rahī vaz-e’-sāz-o-barg-e-chaman

qafas bane haiñ jo tinke the āshiyāñ ke liye

laraz rahe haiñ falak 'ārzū' ki āh-e-rasā

chalī hai teġh-ba-kaf fat.h-e-haft-ḳhvāñ ke liye

hum aaj khaenge ek tir imtihan ke liye

ki waqf karna hai dil-e-naz jaan-sitan ke liye

jala ke dil ko lapak se Daro na shoale ki

zaban-daraaz hai lekin nahin fughan ke liye

usi chaman mein ki wus'at hai jis ki na-mahdud

nahin panah ki ja ek aashiyan ke liye

kiya tha zabt ne dawa raaz-dar-e-'ishq

uTha hai dard kaleje mein imtihan ke liye

kisi ko DhunDhe na milta nazar ki choT ka mail

na hota dil mein suwaida agar nishan ke liye

siwae dil ke jo sarmaya-e-do 'alam hai

na kuchh yahan ke liye hai na kuchh wahan ke liye

na 'ishq jurm hai koi na dil ki baat hai raaz

bura ho sharm ka ek qufl hai zaban ke liye

KHilaf apne rahi waz-e’-saz-o-barg-e-chaman

qafas bane hain jo tinke the aashiyan ke liye

laraz rahe hain falak 'arzu' ki aah-e-rasa

chali hai tegh-ba-kaf fath-e-haft-KHwan ke liye