ab kyā batāūñ maiñ tere milne se kyā milā

ab kyā batā.ūñ maiñ tire milne se kyā milā

irfān-e-ġham huā mujhe apnā patā milā

jab duur tak na koī faqīr-āshnā milā

terā niyāz-mand tire dar se jā milā

manzil milī murād milī mudda.ā milā

sab kuchh mujhe milā jo tirā naqsh-e-pā milā

ḳhud-bīn-o-ḳhud-shanās milā ḳhud-numā milā

insāñ ke bhes meñ mujhe aksar ḳhudā milā

sargashta-e-jamāl kī hairāniyāñ na pūchh

har zarre ke hijāb meñ ik aa.ina milā

paayā tujhe hudūd-e-ta.ayyun se māvarā

manzil se kuchh nikal ke tirā rāsta milā

kyuuñ ye ḳhudā ke DhūñDne vaale haiñ nā-murād

guzrā maiñ jab hudūd-e-ḳhudī se ḳhudā milā

ye ek hī to ne.amat-e-insāñ-navāz thī

dil mujh ko mill gayā to ḳhudā.ī ko kyā milā

yā zaḳhm-e-dil ko chhīl ke siine se pheñk de

yā e'tirāf kar ki nishān-e-vafā milā

'sīmāb' ko shagufta na dekhā tamām umr

kam-baḳht jab milā hameñ ġham-āshnā milā

ab kyā batāūñ maiñ tere milne se kyā milā

irfān-e-ġham huā mujhe apnā patā milā

jab dur tak na koī faqīr-āshnā milā

terā niyāz-mand tere dar se jā milā

manzil milī murād milī muddaā milā

sab kuchh mujhe milā jo tirā naqsh-e-pā milā

ḳhud-bīn-o-ḳhud-shanās milā ḳhud-numā milā

insāñ ke bhes meñ mujhe aksar ḳhudā milā

sargashta-e-jamāl kī hairāniyāñ na pūchh

har zarre ke hijāb meñ ek aaina milā

payā tujhe hudūd-e-tayyun se māwarā

manzil se kuchh nikal ke tirā rāsta milā

kyuñ ye ḳhudā ke DhūñDne wale haiñ nā-murād

guzrā maiñ jab hudūd-e-ḳhudī se ḳhudā milā

ye ek hī to neamat-e-insāñ-nawāz thī

dil mujh ko mill gayā to ḳhudāī ko kyā milā

yā zaḳhm-e-dil ko chhīl ke sine se pheñk de

yā e'tirāf kar ki nishān-e-wafā milā

'sīmāb' ko shagufta na dekhā tamām umr

kam-baḳht jab milā hameñ ġham-āshnā milā