ab tak mere ahwal se wan be-KHabari hai

ab tak mire ahvāl se vaañ be-ḳhabarī hai

ai nāla-e-jāñ-soz ye kiyā be-asarī hai

yaañ tak to rasā quvvat be-bāl-o-parī hai

pahuchūñ huuñ vahāñ terī jahāñ jalvagarī hai

faulād-dilāñ chheriyo zinhār na mujh ko

chhānī mirī joñ sulag sharāroñ se bharī hai

ho jāvai hai us kī saf-e-mizhgāñ se muqābil

is dil ko mire dekhiyo kiyā be-jigarī hai

kis baaġh se aatī hai batā mujh ko ki phir aaj

kuchh aur hī bū tujh meñ nasīm-e-saharī hai

terā hī talab-gār hai dil donoñ-jahāñ maiñ

ne huur kā juuyā hai ne mushtāq-e-parī hai

hai aur hī kuchh āb-o-havā shahr-e-adam kī

har shaḳhs jo 'bedār' udhar ko safarī hai

ab tak mere ahwal se wan be-KHabari hai

ai nala-e-jaan-soz ye kiya be-asari hai

yan tak to rasa quwwat be-baal-o-pari hai

pahuchun hun wahan teri jahan jalwagari hai

faulad-dilan chheriyo zinhaar na mujh ko

chhani meri jon sulag shararon se bhari hai

ho jawai hai us ki saf-e-mizhgan se muqabil

is dil ko mere dekhiyo kiya be-jigari hai

kis bagh se aati hai bata mujh ko ki phir aaj

kuchh aur hi bu tujh mein nasim-e-sahari hai

tera hi talab-gar hai dil donon-jahan main

ne hur ka juya hai ne mushtaq-e-pari hai

hai aur hi kuchh aab-o-hawa shahr-e-adam ki

har shaKHs jo 'bedar' udhar ko safari hai