tumhaare ishq mein dil ko phansae jis ka ji chahe

tumhāre 'ishq meñ dil ko phañsā.e jis kā jī chāhe

javānī ḳhaak meñ apnī milā.e jis kā jī chāhe

vo ruḳh par chhoḌ kar zulfeñ jo hañs-hañs ke kahte haiñ

hamāre daam meñ dil ko phañsā.e jis kā jī chāhe

lagā kar lo sham'-rūoñ se baiThe baiThe jalte haiñ

bas ab dil misl parvāna jalā.e jis kā jī chāhe

kahā maiñ ne ki jaatā huuñ to vo maġhrūr yuuñ bolā

kisī ko rokte ham kab haiñ jaa.e jis kā jī chāhe

ḳhudā shāhid hai tum se surkH-rū ho aaj kahtā huuñ

hamāre qatl par beḌā uThā.e jis kā jī chāhe

ḳhudā us ko ham samjhe haiñ jise mā'shūq kahte haiñ

hamāre jurm ko fatvā lagā.e jis kā jī chāhe

ye sab jhagḌā hai 'rahīm' jiite jī kā zamāna meñ

lahad par gāliyāñ aakar sunā.eñ jis kā jī chāhe

tumhaare 'ishq mein dil ko phansae jis ka ji chahe

jawani KHak mein apni milae jis ka ji chahe

wo ruKH par chhoD kar zulfen jo hans-hans ke kahte hain

hamare dam mein dil ko phansae jis ka ji chahe

laga kar lo sham'-ruon se baiThe baiThe jalte hain

bas ab dil misl parwana jalae jis ka ji chahe

kaha main ne ki jata hun to wo maghrur yun bola

kisi ko rokte hum kab hain jae jis ka ji chahe

KHuda shahid hai tum se surkH-ru ho aaj kahta hun

hamare qatl par beDa uThae jis ka ji chahe

KHuda us ko hum samjhe hain jise ma'shuq kahte hain

hamare jurm ko fatwa lagae jis ka ji chahe

ye sab jhagDa hai 'rahim' jite ji ka zamana mein

lahad par galiyan aakar sunaen jis ka ji chahe