تمہارے عشق میں دل کو پھنسائے جس کا جی چاہے

تمہارے عشق میں دل کو پھنسائے جس کا جی چاہے

جوانی خاک میں اپنی ملائے جس کا جی چاہے

وہ رخ پر چھوڑ کر زلفیں جوہنس ہنس کے کہتے ہیں

ہمارے دام میں دل کو پھنسائے جس کا جی چاہے

لگا کر لو شمع رویوں سے بیٹھے بیٹھے جلتے ہیں

بس اب دل مثل پروانہ جلائے جس کا جی چاہے

کہا میں نے کہ جاتا ہوں تو وہ مغروریوں بولا

کسی کو روکتے ہم کب ہیں جائے جس کا جی چاہے

خدا شاہد ہے تم سے سر خرو ہو آج کہتا ہوں

ہمارے قتل پر بیڑا اٹھائے جس کا جی چاہے

خدا اس کو ہم سمجھے ہیں جسے معشوق کہتے ہیں

ہمارے جرم کو فتویٰ لگائے جس کا جی چاہے

یہ سب جھگڑا ہے رحیمؔ جیتے جی کا زمانہ میں

لحد پر گالیاں آکر سنائیں جس کا جی چاہے