saghar ko chahta hai na ji ab sharab ko

sāġhar ko chāhtā hai na jī ab sharāb ko

dekhā hai chashm-e-mast ko mast-e-shabāb ko

ham dil pe likhte jaate haiñ mehr-o-’itāb ko

ho jā.egā hisāb bhī roz-e-hisāb ko

tum hī pilā ga.e the hameñ apne haath se

us din se ham ne muñh na lagā yā sharāb ko

inkār karke ḳhūn-e-tamannā na kījiye

lab par na aane dījiye aise javāb ko

ham bhī tamāsha barq-e-tajallī kā dekh leñ

parda se bāhar aa kar ulaT do naqāb ko

gar hoñ vo be-ḳhabar to shikāyat kī jā nahīñ

ab kyā kaheñ nigāh-e-taġhāful-ma.āb ko

kyā kar rahe ho chhoḌ do ā.īna haath se

dekhegā kyā ye kaur ruḳh-e-lā-javāb ko

aayā ḳhayāl jab kisī yūsuf jamāl kā

dekhā hai jāgte meñ zuleḳhā ke ḳhvāb ko

zāhid hamāre haath se do ghūñT pī ke dekh

bālā-e-tāq rakh de ’azāb-o-savāb ko

paḌ jaate haiñ usī se to raḳhne nibāh meñ

apnā to hai salām tumhāre 'itāb ko

rahzan tumhārā husn hai ġhārat-gar-e-shakeb

ilzām dete ho dil-e-ḳhāna-ḳharāb ko

'bedil' butoñ se dil ke bachāne kā hausla

ham bhī salām kar leñge achchhā janāb ko

saghar ko chahta hai na ji ab sharab ko

dekha hai chashm-e-mast ko mast-e-shabab ko

hum dil pe likhte jate hain mehr-o-’itab ko

ho jaega hisab bhi roz-e-hisab ko

tum hi pila gae the hamein apne hath se

us din se hum ne munh na laga ya sharab ko

inkar karke KHun-e-tamanna na kijiye

lab par na aane dijiye aise jawab ko

hum bhi tamasha barq-e-tajalli ka dekh len

parda se bahar aa kar ulaT do naqab ko

gar hon wo be-KHabar to shikayat ki ja nahin

ab kya kahen nigah-e-taghaful-maab ko

kya kar rahe ho chhoD do aaina hath se

dekhega kya ye kaur ruKH-e-la-jawab ko

aaya KHayal jab kisi yusuf jamal ka

dekha hai jagte mein zuleKHa ke KHwab ko

zahid hamare hath se do ghunT pi ke dekh

baala-e-taq rakh de ’azab-o-sawab ko

paD jate hain usi se to raKHne nibah mein

apna to hai salam tumhaare 'itab ko

rahzan tumhaara husn hai ghaarat-gar-e-shakeb

ilzam dete ho dil-e-KHana-KHarab ko

'bedil' buton se dil ke bachane ka hausla

hum bhi salam kar lenge achchha janab ko