qafas mein baiTh kar barq-e-tapan ko yaad karte hain

qafas meñ baiTh kar barq-e-tapāñ ko yaad karte haiñ

bahāreñ luT chukī haiñ ab ḳhizāñ ko yaad karte haiñ

ye jab mā'lūm hai vo dil ke andar jalva-ārā haiñ

ḳhudā mā'lūm ham kyuuñ āstāñ ko yaad karte haiñ

nasheman jal chukā phir bhī chaman se 'ishq hai utnā

ki ham har saañs meñ daur-e-ḳhizāñ ko yaad karte haiñ

'ra.ūf' is 'ālam-e-pīrī meñ ye hai mashġhala apnā

ki ham rah-rah ke apnī dāstāñ ko yaad karte haiñ

qafas mein baiTh kar barq-e-tapan ko yaad karte hain

bahaaren luT chuki hain ab KHizan ko yaad karte hain

ye jab ma'lum hai wo dil ke andar jalwa-ara hain

KHuda ma'lum hum kyun aastan ko yaad karte hain

nasheman jal chuka phir bhi chaman se 'ishq hai utna

ki hum har sans mein daur-e-KHizan ko yaad karte hain

'rauf' is 'alam-e-piri mein ye hai mashghala apna

ki hum rah-rah ke apni dastan ko yaad karte hain