apne begane KHafa sare ke sare ho gae

apne begāne ḳhafā saare ke saare ho ga.e

sirf itnī baat par tum kyuuñ hamāre ho ga.e

jab se vo kah kar ga.e haiñ ham tumhāre ho ga.e

dostoñ kā zikr kyā dushman bhī pyāre ho ga.e

kitne ġham roke hue thī vo nigāh-e-iltifāt

ye unhīñ se pūchhiye jo be-sahāre ho ga.e

shīsha-e-hastī pe itnī to na thī gard-e-malāl

kyā ziyāda din unheñ gesū sañvāre ho ga.e

un hasīñ āñkhoñ meñ aakar ashk bhī mere liye

kuchh shagūfe ban ga.e kuchh chāñd taare ho ga.e

chalne vaale hī batā.eñge safar ke sub.h-o-shām

un se kyā pūchhūñ jo thak kar ik kināre ho ga.e

ahl-e-dānish kī jabīneñ pur-shikan hī rah ga.iiñ

kab na jaane tum hamāre ham tumhāre ho ga.e

ḳhush-dilī ke saath hañsne kī umañgeñ thiiñ 'adīb'

jab tabī'at bujh ga.ī aañsū hī pyāre ho ga.e

apne begane KHafa sare ke sare ho gae

sirf itni baat par tum kyun hamare ho gae

jab se wo kah kar gae hain hum tumhaare ho gae

doston ka zikr kya dushman bhi pyare ho gae

kitne gham roke hue thi wo nigah-e-iltifat

ye unhin se puchhiye jo be-sahaare ho gae

shisha-e-hasti pe itni to na thi gard-e-malal

kya ziyaada din unhen gesu sanware ho gae

un hasin aankhon mein aakar ashk bhi mere liye

kuchh shagufe ban gae kuchh chand tare ho gae

chalne wale hi bataenge safar ke subh-o-sham

un se kya puchhun jo thak kar ek kinare ho gae

ahl-e-danish ki jabinen pur-shikan hi rah gain

kab na jaane tum hamare hum tumhaare ho gae

KHush-dili ke sath hansne ki umangen thin 'adib'

jab tabi'at bujh gai aansu hi pyare ho gae