aae na harf zabt pe pir-e-mughan kahin

aa.e na harf zabt pe pīr-e-muġhāñ kahīñ

ban jaa.eñ ḳhud savāl na añgḌā.iyāñ kahīñ

kartī haiñ sajda jo ruḳh-e-jānāñ ko dekh kar

jhuktī haiñ sañg-e-dar pe peshāniyāñ kahīñ

ahl-e-ḳhirad surāġh lagāte hī rah ga.e

ahl-e-junūñ kī mil na sakīñ dhajjiyāñ kahīñ

be-rabta.ī sujūd kā andāz dekh kar

badlā na le jabīñ se tirā āstāñ kahīñ

bālīñ pe aa ke maut bhī aksar palaT ga.ī

duniyā meñ hoñge ham se na ab saḳht-jāñ kahīñ

'afqar' milegī hashr meñ sabr-o-razā kī daad

lekin malegā ab na mirā āshiyāñ kahīñ

aae na harf zabt pe pir-e-mughan kahin

ban jaen KHud sawal na angDaiyan kahin

karti hain sajda jo ruKH-e-jaanan ko dekh kar

jhukti hain sang-e-dar pe peshaniyan kahin

ahl-e-KHirad suragh lagate hi rah gae

ahl-e-junun ki mil na sakin dhajjiyan kahin

be-rabtai sujud ka andaz dekh kar

badla na le jabin se tera aastan kahin

baalin pe aa ke maut bhi aksar palaT gai

duniya mein honge hum se na ab saKHt-jaan kahin

'afqar' milegi hashr mein sabr-o-raza ki dad

lekin malega ab na mera aashiyan kahin