روکے تھمتا نہیں وہ شمعِ شبستاں ہوں میں

روکے تھمتا نہیں وہ شمعِ شبستاں ہوں میں

جل کے بجھتا نہیں وہ سرو چراغاں ہوں میں

ہر تعین میں تنزل کی پڑی منہ پہ نقاب

سات پردوں میں چھپا ہوں عجب انساں ہوں میں

میں جو کہتا ہوں مجھے سب سے ہے ایماں پیارا

وہ یہ کہتے ہیں کہ غارت گر ایماں ہوں میں

کسی صورت کسی عالم میں نہیں دلجمعی

کیا تری زلف ہوں اتنا جو پریشاں ہوں میں

کبھی پروانہ کبھی بزم کبھی بزم نشیں

کبھی فانوس کبھی شمعِ شبستاں ہوں میں

اپنے گھر میں جو پہنچ جاؤں تو دلجمعی ہو

ہفت اقلیم میں پھرتا ہوں پریشاں ہوں میں

ہے فقط دوست پرستی مرا مذہب مائلؔ

سچ تو یہ ہے کہ نہ کافر نہ مسلماں ہوں میں