roke thamta nahin wo sham-e-shabistan hun main

roke thamtā nahīñ vo sham'-e-shabistāñ huuñ maiñ

jal ke bujhtā nahīñ vo sarv-e-charāġhāñ huuñ maiñ

har ta'ayyun meñ tanazzul kī paḌī muñh pe naqāb

saat pardoñ meñ chhapā huuñ 'ajab insāñ huuñ maiñ

maiñ jo kahtā huuñ mujhe sab se hai īmāñ pyārā

vo ye kahte haiñ ki ġhārat gar-e-īmāñ huuñ maiñ

kisī sūrat kisī 'ālam meñ nahīñ dil-jam'ī

kyā tirī zulf huuñ itnā jo pareshāñ huuñ maiñ

kabhī parvāna kabhī bazm kabhī bazm-nashīñ

kabhī fānūs kabhī sham'-e-shabistāñ huuñ maiñ

apne ghar meñ jo pahuñch jā.ūñ to dil-jam'ī ho

haf-iqlīm meñ phirtā huuñ pareshāñ huuñ maiñ

hai faqat dost-parastī mirā maz.hab 'mā.il'

sach to ye hai ki na kāfir na musalmāñ huuñ maiñ

roke thamta nahin wo sham'-e-shabistan hun main

jal ke bujhta nahin wo sarw-e-charaghan hun main

har ta'ayyun mein tanazzul ki paDi munh pe naqab

sat pardon mein chhapa hun 'ajab insan hun main

main jo kahta hun mujhe sab se hai iman pyara

wo ye kahte hain ki ghaarat gar-e-iman hun main

kisi surat kisi 'alam mein nahin dil-jam'i

kya teri zulf hun itna jo pareshan hun main

kabhi parwana kabhi bazm kabhi bazm-nashin

kabhi fanus kabhi sham'-e-shabistan hun main

apne ghar mein jo pahunch jaun to dil-jam'i ho

haf-iqlim mein phirta hun pareshan hun main

hai faqat dost-parasti mera mazhab 'mail'

sach to ye hai ki na kafir na musalman hun main