kya sabr ho kya chain ho jab wo nazar aae

kyā sabr ho kyā chain ho jab vo nazar aa.e

dil thaam liyā jaan chalī ashk bhar aa.e

ab aur kahāñ diid kī ummīd bar aa.e

mahshar meñ bhī vo aa.e to muñh Dhāñp kar aa.e

āñkheñ to mirī band thiiñ hañgām tasavvur

allāh vo kis raah se dil meñ utar aa.e

fiqroñ ke samandar kā kinārā nahīñ miltā

Duube kabhī paanī meñ kabhī ham ubhar aa.e

iz.hār-e-haqīqat pe shanāsā.ī hai mauqūf

pahchāne yahāñ kaun ḳhudā bhī agar aa.e

miT jaa.e burā.ī jo guzar jā.ūñ ḳhud se

agar 'aib hunar ho mujhe aisā nazar aa.e

dekho to ye mai-ḳhāna hai masjid nahīñ 'mā.il'

kyā bhuul ga.e rāsta dekho kidhar aa.e

kya sabr ho kya chain ho jab wo nazar aae

dil tham liya jaan chali ashk bhar aae

ab aur kahan did ki ummid bar aae

mahshar mein bhi wo aae to munh Dhanp kar aae

aankhen to meri band thin hangam tasawwur

allah wo kis rah se dil mein utar aae

fiqron ke samandar ka kinara nahin milta

Dube kabhi pani mein kabhi hum ubhar aae

izhaar-e-haqiqat pe shanasai hai mauquf

pahchane yahan kaun KHuda bhi agar aae

miT jae burai jo guzar jaun KHud se

agar 'aib hunar ho mujhe aisa nazar aae

dekho to ye mai-KHana hai masjid nahin 'mail'

kya bhul gae rasta dekho kidhar aae