sari KHilqat rah mein hai aur ho manzil mein tum

saarī ḳhilqat raah meñ hai aur ho manzil meñ tum

donoñ 'ālam dil se bāhar haiñ faqat ho dil meñ tum

ham se pūchho ġhair kī mahfil meñ be-tābī kā haal

tum ko kyā mā'lūm kab taḌpe kisī mahfil meñ tum

kis qadar tum se mohabbat hai mujhe ḳhud dekh lo

apnī āñkheñ Daal do ik roz mere dil meñ tum

maiñ jahāñ jaatā huuñ aate ho vahāñ mujh ko nazar

raah meñ tum ghar meñ tum ḳhalvat meñ tum mahfil meñ tum

dekhte kyā ho karo hūroñ pe bhī ik vaar aaj

apnī shoḳhī Daal do be-tābī bismil meñ tum

vasl kā naqsha kuchh aisā hai ki donoñ ek haiñ

sach to kah do tum meñ hai 'mā.il' ki ho 'mā.il' meñ tum

sari KHilqat rah mein hai aur ho manzil mein tum

donon 'alam dil se bahar hain faqat ho dil mein tum

hum se puchho ghair ki mahfil mein be-tabi ka haal

tum ko kya ma'lum kab taDpe kisi mahfil mein tum

kis qadar tum se mohabbat hai mujhe KHud dekh lo

apni aankhen Dal do ek roz mere dil mein tum

main jahan jata hun aate ho wahan mujh ko nazar

rah mein tum ghar mein tum KHalwat mein tum mahfil mein tum

dekhte kya ho karo huron pe bhi ek war aaj

apni shoKHi Dal do be-tabi bismil mein tum

wasl ka naqsha kuchh aisa hai ki donon ek hain

sach to kah do tum mein hai 'mail' ki ho 'mail' mein tum