bigaD ke mujhse wo mere liye udas bhi hai

bigaḌ ke mujh se vo mere liye udaas bhī hai

vo zūd-ranj to hai par vafā-shanās bhī hai

taqāze jism ke apne haiñ dil kā apnā mizāj

vo mujh se duur hai aur mere aas paas bhī hai

na jaane kaun se chashme haiñ māvarā-e-badan

ki pā chukā huuñ jise mujh ko us kī pyaas bhī hai

vo ek paikar-e-mahsūs phir bhī nā-mahsūs

mirā yaqīn bhī hai aur mirā qiyās bhī hai

hasīñ bahut haiñ magar merā intiḳhāb hai vo

ki us ke husn pe bātin kā in’ikās bhī hai

'nadīm' usī kā karam hai ki us ke dar se milā

vo ek dard-e-musalsal jo mujh ko raas bhī hai

bigaD ke mujh se wo mere liye udas bhi hai

wo zud-ranj to hai par wafa-shanas bhi hai

taqaze jism ke apne hain dil ka apna mizaj

wo mujh se dur hai aur mere aas pas bhi hai

na jaane kaun se chashme hain mawara-e-badan

ki pa chuka hun jise mujh ko us ki pyas bhi hai

wo ek paikar-e-mahsus phir bhi na-mahsus

mera yaqin bhi hai aur mera qiyas bhi hai

hasin bahut hain magar mera intiKHab hai wo

ki us ke husn pe baatin ka in’ikas bhi hai

'nadim' usi ka karam hai ki us ke dar se mila

wo ek dard-e-musalsal jo mujh ko ras bhi hai