dil ki ummiden miTa kar kya mila

dil kī ummīdeñ miTā kar kyā milā

ai falak ham ko satā kar kyā milā

ārzūeñ bhī haiñ ġham bhī dard bhī

phir na kahnā dil meñ aa kar kyā milā

kū-e-jānāñ se nikalvā.e ga.e

vahshiyoñ ko ḳhaak uḌā kar kyā milā

jaan detā maiñ tire har naaz par

ġhair se āñkheñ milā kar kyā milā

kahte haiñ hañs-hañs ke mujh se dil ke zaḳhm

kūcha-e-qātil meñ jā kar kyā milā

jo tamannā.eñ thiiñ dil meñ miT ga.iiñ

ham ko qismat aazmā kar kyā milā

aur bhī vo mujh se nā-ḳhush ho ga.e

dāstān-e-ġham sunā kar kyā milā

'aks-e-ruḳh par ho ga.e shaidā vo aap

ā.īna ko muñh dikhā kar kyā milā

muñh chhupā.e baiThe haiñ vo bazm meñ

kyā kaheñ ham aañkh uThā kar kyā milā

shāhī-e-mulk-e-sulaimāñ bhī hai kam

kyā batā.eñ tum ko pākar kyā milā

yaar se 'ehsān' pūchho to sahī

ḳhaak meñ ham ko milā kar kyā milā

dil ki ummiden miTa kar kya mila

ai falak hum ko sata kar kya mila

aarzuen bhi hain gham bhi dard bhi

phir na kahna dil mein aa kar kya mila

ku-e-jaanan se nikalwae gae

wahshiyon ko KHak uDa kar kya mila

jaan deta main tere har naz par

ghair se aankhen mila kar kya mila

kahte hain hans-hans ke mujh se dil ke zaKHm

kucha-e-qatil mein ja kar kya mila

jo tamannaen thin dil mein miT gain

hum ko qismat aazma kar kya mila

aur bhi wo mujh se na-KHush ho gae

dastan-e-gham suna kar kya mila

'aks-e-ruKH par ho gae shaida wo aap

aaina ko munh dikha kar kya mila

munh chhupae baiThe hain wo bazm mein

kya kahen hum aankh uTha kar kya mila

shahi-e-mulk-e-sulaiman bhi hai kam

kya bataen tum ko pakar kya mila

yar se 'ehsan' puchho to sahi

KHak mein hum ko mila kar kya mila