mere qabu se shab-e-gham dil hi kya jata raha

mere qaabū se shab-e-ġham-e-dil hī kyā jaatā rahā

ārzū-e-vasl kā bhī hausla jaatā rahā

aañkh milte hī dil dard āshnā jaatā rahā

kyā kaheñ kyā mil gayā aaj aur kyā jaatā rahā

pyaar kī āñkhoñ se un kā dekhnā jaatā rahā

vo tamannā rah ga.ī vo aasrā jaatā rahā

aaj un ko vā’da-e-fardā se bhī inkār hai

vaa.e nākāmī ki ye bhī aasrā jaatā rahā

lutf ho jab dil ke kho jaane kā maiñ shikva karūñ

tum kaho ham kyā kareñ jaatā rahā jaatā rahā

bas bahut chheḌo na mujh ko mudda'ī ke sāmne

chāhte ho tum ki maiñ kah duuñ gilā jaatā rahā

vasl kā vā'da nahīñ karte magar hañste to haiñ

ye bhī kyā kam hai ki andāz hayā jaatā rahā

haath rakh kar mere siine par zarā tum dekh lo

kaun kahtā hai ki dard lā-davā jaatā rahā

sun liyā hai dāvar-e-mahshar ko jab se be-niyāz

kahte haiñ andesha-e-roz-e-jazā jaatā rahā

justujū-e-dil meñ mujh ko dekh kar kahte haiñ vo

kaun sī shai DhūñDhte phirte ho kyā jaatā rahā

rū-ba-rū mere bharī mahfil meñ ham-zānū haiñ ġhair

un se mil kar baiThne kā ab mazā jaatā rahā

vasl kī shab bosoñ kī daulat bachā.ī ruuTh kar

maal mere haath ek aayā huā jaatā rahā

uns karatā ḳhāna-e-dil se mire kyā dard-e-'ishq

chaar din Tahlā phirā baiThā uThā jaatā rahā

us ko parde meñ biThā.e rakhtī hai āñkhoñ kī sharm

yaar kī uThtī javānī kā mazā jaatā rahā

rok dekhe dil mirā 'ehsān' tīr-e-yār ko

rah gayā tū rah gayā jaatā rahā jaatā rahā

mere qabu se shab-e-gham-e-dil hi kya jata raha

aarzu-e-wasl ka bhi hausla jata raha

aankh milte hi dil dard aashna jata raha

kya kahen kya mil gaya aaj aur kya jata raha

pyar ki aankhon se un ka dekhna jata raha

wo tamanna rah gai wo aasra jata raha

aaj un ko wa’da-e-farda se bhi inkar hai

wae nakaami ki ye bhi aasra jata raha

lutf ho jab dil ke kho jaane ka main shikwa karun

tum kaho hum kya karen jata raha jata raha

bas bahut chheDo na mujh ko mudda'i ke samne

chahte ho tum ki main kah dun gila jata raha

wasl ka wa'da nahin karte magar hanste to hain

ye bhi kya kam hai ki andaz haya jata raha

hath rakh kar mere sine par zara tum dekh lo

kaun kahta hai ki dard la-dawa jata raha

sun liya hai dawar-e-mahshar ko jab se be-niyaz

kahte hain andesha-e-roz-e-jaza jata raha

justuju-e-dil mein mujh ko dekh kar kahte hain wo

kaun si shai DhunDhte phirte ho kya jata raha

ru-ba-ru mere bhari mahfil mein ham-zanu hain ghair

un se mil kar baiThne ka ab maza jata raha

wasl ki shab boson ki daulat bachai ruTh kar

mal mere hath ek aaya hua jata raha

uns karata KHana-e-dil se mere kya dard-e-'ishq

chaar din Tahla phira baiTha uTha jata raha

us ko parde mein biThae rakhti hai aankhon ki sharm

yar ki uThti jawani ka maza jata raha

rok dekhe dil mera 'ehsan' tir-e-yar ko

rah gaya tu rah gaya jata raha jata raha