میرے قابو سے شبِ غمِ دل ہی کیا جاتا رہا

میرے قابو سے شبِ غمِ دل ہی کیا جاتا رہا

آرزوئے وصل کا بھی حوصلہ جاتا رہا

آنکھ ملتے ہی دلِ دردِ آشنا جاتا رہا

کیا کہیں کیا مل گیا آج اور کیا جاتا رہا

پیار کی آنکھوں سے ان کا دیکھنا جاتا رہا

وہ تمنا رہ گئی وہ آسرا جاتا رہا

آج ان کو وعدۂ فردا سے بھی انکار ہے

وائے ناکامی کہ یہ بھی آسرا جاتا رہا

لطف ہو جب دل کے کھو جانے کا میں شکوہ کروں

تم کہو ہم کیا کریں جاتا رہا جاتا رہا

بس بہت چھیڑو نہ مجھ کو مدعی کے سامنے

چاہتے ہو تم کہ میں کہہ دوں گلا جاتا رہا

وصل کا وعدہ نہیں کرتے مگر ہنستے تو ہیں

یہ بھی کیا کم ہے کہ اندازِ حیا جاتا رہا

ہاتھ رکھ کر میرے سینے پر ذرا تم دیکھ لو

کون کہتا ہے کہ دردِ لادوا جاتا رہا

سن لیا ہے داورِ محشر کو جب سے بے نیاز

کہتے ہیں اندیشۂ روزِ جزا جاتا رہا

جستجوئے دل میں مجھ کو دیکھ کر کہتے ہیں وہ

کون سی شے ڈھونڈھتے پھرتے ہو کیا جاتا رہا

رو برو میرے بھری محفل میں ہم زانو ہیں غیر

ان سے مل کر بیٹھنے کا اب مزا جاتا رہا

وصل کی شب بوسوں کی دولت بچائی روٹھ کر

مال میرے ہاتھ ایک آیا ہوا جاتا رہا

انس کرتا خانۂ دل سے مرے کیا دردِ عشق

چار دن ٹہلا پھرا بیٹھا اٹھا جاتا رہا

اس کو پردے میں بٹھائے رکھتی ہے آنکھوں کی شرم

یار کی اٹھتی جوانی کا مزا جاتا رہا

روک دیکھے دل مرا احسانؔ تیرِ یار کو

رہ گیا تو رہ گیا جاتا رہا جاتا رہا