ajab eajaz hai teri nazar ka

ajab e.ajāz hai terī nazar kā

ke ham bhūle haiñ rasta apne ghar kā

sahar aa.ī to yaad aa.e vo taare

pata jin se milā ham ko sahar kā

chale ho chhoḌ kar pahle qadam par

chale the saath dene umr-bhar kā

bahāreñ aa ga.iiñ jab aap aa.e

duāoñ ne bhī muñh dekhā asar kā

haqīqat kyā fareb-e-āgahī hai

nazar bhī ek dhokā hai nazar kā

adam se bhī pare thī apnī manzil

safar anjām thā apne safar kā

mirī āñkheñ huiiñ namnāk 'vāsif'

ḳhayāl aayā kisī kī chashm-e-tar kā

ajab eajaz hai teri nazar ka

ke hum bhule hain rasta apne ghar ka

sahar aai to yaad aae wo tare

pata jin se mila hum ko sahar ka

chale ho chhoD kar pahle qadam par

chale the sath dene umr-bhar ka

bahaaren aa gain jab aap aae

duaon ne bhi munh dekha asar ka

haqiqat kya fareb-e-agahi hai

nazar bhi ek dhoka hai nazar ka

adam se bhi pare thi apnī manzil

safar anjam tha apne safar ka

meri aankhen huin namnak 'wasif'

KHayal aaya kisi ki chashm-e-tar ka