wahi bazm hai wahi mai-kada wahi mai-kada ka maqam hai

vahī bazm hai vahī mai-kada vahī mai-kada kā maqām hai

magar ek un ke na hone se na vo sub.h hai na vo shaam hai

huā jab se pīr-e-muġhāñ nihāñ huā bazm kā kuchh 'ajab samāñ

na vo mai-kada na vo jaam hai na vo mai-kada kā nizām hai

diyā gulistāñ ke liye lahū sahe har tarah ke sitam magar

na chaman meñ hai merā zikr ab na vafā-shi.āroñ meñ naam hai

kabhī ek sajda se hotī thī tirī jalva-gāh kī raah tai

magar ab kahāñ vo ḳhulūs-e-dil na vo muqtadī na imaam hai

hai har ek zarra se vo 'ayāñ go vo laakh pardoñ meñ hai nihāñ

jo nazar na aa.e nigāh ko to 'aqīdat apnī hī ḳhaam hai

jo kaheñ bhī un se to kyā kaheñ vo suneñge dil kā fasāna kab

vo jab is tarah se haiñ bad-gumāñ na salām hai na payām hai

jise pīte-pīte nigāh se the hijāb jitne vo uTh ga.e

ye batā de shaiḳh-e-haram mujhe vo sharāb kaise harām hai

yahī rashk roz-e-azal se hai yahī fikr hūr-o-malak ko hai

na farishta jā sake jis jagah vo bashar kā adnā maqām hai

faqat ek ‘akHtar-e-be-navā tire naqsh-e-pā pe hai chal rahā

ye vo daur varna hai sāqiyā ki har ek riñd imaam hai

wahi bazm hai wahi mai-kada wahi mai-kada ka maqam hai

magar ek un ke na hone se na wo subh hai na wo sham hai

hua jab se pir-e-mughan nihan hua bazm ka kuchh 'ajab saman

na wo mai-kada na wo jam hai na wo mai-kada ka nizam hai

diya gulistan ke liye lahu sahe har tarah ke sitam magar

na chaman mein hai mera zikr ab na wafa-shiaron mein nam hai

kabhi ek sajda se hoti thi teri jalwa-gah ki rah tai

magar ab kahan wo KHulus-e-dil na wo muqtadi na imam hai

hai har ek zarra se wo 'ayan go wo lakh pardon mein hai nihan

jo nazar na aae nigah ko to 'aqidat apni hi KHam hai

jo kahen bhi un se to kya kahen wo sunenge dil ka fasana kab

wo jab is tarah se hain bad-guman na salam hai na payam hai

jise pite-pite nigah se the hijab jitne wo uTh gae

ye bata de shaiKH-e-haram mujhe wo sharab kaise haram hai

yahi rashk roz-e-azal se hai yahi fikr hur-o-malak ko hai

na farishta ja sake jis jagah wo bashar ka adna maqam hai

faqat ek ‘akHtar-e-be-nawa tere naqsh-e-pa pe hai chal raha

ye wo daur warna hai saqiya ki har ek rind imam hai