jo hain shaiKH-e-haram bagh-e-jinan ke dekhne wale

jo haiñ shaiḳh-e-haram bāġh-e-jināñ ke dekhne vaale

to ham bhī haiñ kisī ke āstāñ ke dekhne vaale

unhīñ kī mast nazroñ se hameñ ab kaif miltā hai

jo kuchh baaqī haiñ ab pīr-e-muġhāñ ke dekhne vaale

vo dekheñ aake ab ujḌe hue mere nasheman ko

kabhī jo the bahār-e-āstāñ ke dekhne vaale

ye ḳhūbī vaqt kī hai aaj ham nañg-e-gulistāñ haiñ

kabhī ham bhī the nazm-e-gulistāñ ke dekhne vaale

haram vaale haram se dair vaale dair se jākar

palaT aa.e haiñ un ke āstāñ ke dekhne vaale

pahuñch vo bhī ga.e al-qissa ik din apnī manzil ko

nazar se duur gard-e-kārvāñ ke dekhne vaale

ġhanīmat jāniye ab un ke naqsh-e-pā ko ai 'aḳhtar'

ki jo baaqī haiñ mīr-e-kārvāñ ke dekhne vaale

jo hain shaiKH-e-haram bagh-e-jinan ke dekhne wale

to hum bhi hain kisi ke aastan ke dekhne wale

unhin ki mast nazron se hamein ab kaif milta hai

jo kuchh baqi hain ab pir-e-mughan ke dekhne wale

wo dekhen aake ab ujDe hue mere nasheman ko

kabhi jo the bahaar-e-astan ke dekhne wale

ye KHubi waqt ki hai aaj hum nang-e-gulistan hain

kabhi hum bhi the nazm-e-gulistan ke dekhne wale

haram wale haram se dair wale dair se jakar

palaT aae hain un ke aastan ke dekhne wale

pahunch wo bhi gae al-qissa ek din apni manzil ko

nazar se dur gard-e-karwan ke dekhne wale

ghanimat jaaniye ab un ke naqsh-e-pa ko ai 'aKHtar'

ki jo baqi hain mir-e-karwan ke dekhne wale