waiz tere liye tera iman hai zindagi

vā'iz tire liye tirā īmāñ hai zindagī

mere liye to jalva-e-jānāñ hai zindagī

ik jumbish-e-nigāh kī mehmāñ hai zindagī

saaqī tirī nigāh meñ pinhāñ hai zindagī

hañs karke dekhnā tirā chilman se jhāñk kar

itnī sī baat par merī nāzāñ hai zindagī

ai jān-e-nau-bahār sukūn-e-dil-o-jigar

gar tū nahīñ to be-sar-o-sāmāñ hai zindagī

ban-Than ke kis tarah se vo nikle haiñ ghar se aaj

har ik adaa.e dost pe qurbāñ hai zindagī

ai yaad yaar kyuuñ na mujhe dil meñ biThā.ūñ

tere baġhair bas merī vīrāñ hai zindagī

ho jaa.e ai 'amīr' jo apne nasīb meñ

mastī-bharī nigāh kā paikāñ hai zindagī

wa'iz tere liye tera iman hai zindagi

mere liye to jalwa-e-jaanan hai zindagi

ek jumbish-e-nigah ki mehman hai zindagi

saqi teri nigah mein pinhan hai zindagi

hans karke dekhna tera chilman se jhank kar

itni si baat par meri nazan hai zindagi

ai jaan-e-nau-bahaar sukun-e-dil-o-jigar

gar tu nahin to be-sar-o-saman hai zindagi

ban-Than ke kis tarah se wo nikle hain ghar se aaj

har ek adae dost pe qurban hai zindagi

ai yaad yar kyun na mujhe dil mein biThaun

tere baghair bas meri viran hai zindagi

ho jae ai 'amir' jo apne nasib mein

masti-bhari nigah ka paikan hai zindagi