shifa ki apni ab mangen dua kya

shifā kī apnī ab māñgeñ du'ā kyā

ki āñkhoñ meñ hai dam ham meñ rahā kyā

na pisne par chhupegī us kī surḳhī

hai pattoñ meñ chhupā rañg-e-hinā kyā

mufassal hāl-e-dil vo pūchhte haiñ

kahūñ ai be-zabānī aaj kiyā kyā

bhalā.ī kuchh 'ajab shai hai jahāñ meñ

bhalā chāho to is meñ hai burā kyā

na kyuuñ dīvāñ meñ mere 'aib ho 'arsh'

sarāpā huuñ ḳhatā merī ḳhatā kyā

shifa ki apni ab mangen du'a kya

ki aankhon mein hai dam hum mein raha kya

na pisne par chhupegi us ki surKHi

hai patton mein chhupa rang-e-hina kya

mufassal haal-e-dil wo puchhte hain

kahun ai be-zabani aaj kiya kya

bhalai kuchh 'ajab shai hai jahan mein

bhala chaho to is mein hai bura kya

na kyun diwan mein mere 'aib ho 'arsh'

sarapa hun KHata meri KHata kya