aaram tere kuche mein zinhaar na paya

ārām tire kūche meñ zinhār na paayā

DhūñDhā to kahīñ sāya-e-dīvār na paayā

kāvish rahī har chand ki gulzār-e-jahāñ meñ

lekin gul-e-tar kyā ki koī ḳhaar na paayā

aayā thā davā karne vo bīmār samajh kar

maiñ ho gayā achchhā mujhe bīmār na paayā

is kūche meñ marne pe har ik mor-o-magas ne

DhūñDhā pe kahīñ merā tan-e-zār na paayā

haañ ik dil-e-marhūm thā ab vo bhī nahīñ 'arsh'

is daur meñ ham ne koī ġham-ḳhvār na paayā

aaram tere kuche mein zinhaar na paya

DhunDha to kahin saya-e-diwar na paya

kawish rahi har chand ki gulzar-e-jahan mein

lekin gul-e-tar kya ki koi KHar na paya

aaya tha dawa karne wo bimar samajh kar

main ho gaya achchha mujhe bimar na paya

is kuche mein marne pe har ek mor-o-magas ne

DhunDha pe kahin mera tan-e-zar na paya

han ek dil-e-marhum tha ab wo bhi nahin 'arsh'

is daur mein hum ne koi gham-KHwar na paya