bahaar-e-bagh-e-gulistan-e-sarmadi hum hain

bahār-e-bāġh-e-gulistān-e-sarmadī ham haiñ

ḳhudā ke saath haiñ daa.im vo aadmī ham haiñ

vo be-ḳhudī ki haqīqat meñ hai ḳhudī ham haiñ

niyāz-e-bandagī-o-nāz-e-kHvājagī ham haiñ

jis anjuman meñ diloñ ke charāġh jalte haiñ

us anjuman meñ charāġhoñ kī raushnī ham haiñ

misāl-e-barq-e-tamannā ba-rañg-e-ātish-e-shauq

ye aag jo hai diloñ meñ lagī huī ham haiñ

hai ek aañkh meñ sūraj to ek aañkh meñ chāñd

taġhayyūrāt-e-shab-o-roz se barī ham haiñ

ḳhajil hai nuur mohabbat se zulmat-e-nafrat

jo sham.a tund havā na bujha sakī ham haiñ

ye vāqi.a hai ki sab kuchh hai tū hī to ai dost

ye aur baat ke jo kuchh hai tū vahī ham haiñ

bahut baḌe haiñ haqīqat meñ ham zahīn magar

rah-e-majāz meñ sab se baḌī kamī ham haiñ

bahaar-e-bagh-e-gulistan-e-sarmadi hum hain

KHuda ke sath hain daim wo aadmi hum hain

wo be-KHudi ki haqiqat mein hai KHudi hum hain

niyaz-e-bandagi-o-naz-e-kHwajagi hum hain

jis anjuman mein dilon ke charagh jalte hain

us anjuman mein charaghon ki raushni hum hain

misal-e-barq-e-tamanna ba-rang-e-atish-e-shauq

ye aag jo hai dilon mein lagi hui hum hain

hai ek aankh mein suraj to ek aankh mein chand

taghayyuraat-e-shab-o-roz se bari hum hain

KHajil hai nur mohabbat se zulmat-e-nafrat

jo shama tund hawa na bujha saki hum hain

ye waqia hai ki sab kuchh hai tu hi to ai dost

ye aur baat ke jo kuchh hai tu wahi hum hain

bahut baDe hain haqiqat mein hum zahin magar

rah-e-majaz mein sab se baDi kami hum hain