tasawwur hai kisi parda-nashin ka

tasavvur hai kisī parda-nashīñ kā

ye 'ālam hai dil-e-andoh-gīñ kā

ye 'aks-e-ruḳh hai kis parda-nashīñ kā

banā hai mahr har zarra zamīñ kā

jabīñ jab se jhukī hai bahr-e-sajda

falak se pochhiye rutba zamīñ kā

ubhar aayā hai phir merā safīna

karam dekho ye mauj-e-tah-nashīñ kā

na laatā taab dīd-e-yār lekin

sahārā hai nigāh-e-avvalīñ kā

dil-e-muztar shikasta ho to kyuuñ kar

makāñ ko paas hai apne makīñ kā

azal se aaj tak hai vaqf-e-sajda

koī ye hausla dekhe jabīñ kā

hijāboñ par bhī ho jaatā hai zāhir

yahī parda to hai parda-nashīñ kā

huā hai jab se dāman pāra-pāra

to aayā hosh ham ko āstīñ kā

hazāroñ rañg ke jalve meñ us meñ

falak hairāñ hai kyā kahnā zamīñ kā

hamārā haal ab abtar hai 'bahzād'

mohabbat ne nahīñ rakkhā kahīñ kā

tasawwur hai kisi parda-nashin ka

ye 'alam hai dil-e-andoh-gin ka

ye 'aks-e-ruKH hai kis parda-nashin ka

bana hai mahr har zarra zamin ka

jabin jab se jhuki hai bahr-e-sajda

falak se pochhiye rutba zamin ka

ubhar aaya hai phir mera safina

karam dekho ye mauj-e-tah-nashin ka

na lata tab did-e-yar lekin

sahaara hai nigah-e-awwalin ka

dil-e-muztar shikasta ho to kyun kar

makan ko pas hai apne makin ka

azal se aaj tak hai waqf-e-sajda

koi ye hausla dekhe jabin ka

hijabon par bhi ho jata hai zahir

yahi parda to hai parda-nashin ka

hua hai jab se daman para-para

to aaya hosh hum ko aastin ka

hazaron rang ke jalwe mein us mein

falak hairan hai kya kahna zamin ka

hamara haal ab abtar hai 'bahzad'

mohabbat ne nahin rakkha kahin ka