har nafas girya-o-matam ke siwa kuchh bhi nahin

har nafas girya-o-mātam ke sivā kuchh bhī nahīñ

zindagī kyā hai tere ġham ke sivā kuchh bhī nahīñ

ashk-e-hasrat lab-e-ḳhāmosh fuġhān-e-mahrūm

paas mere mere 'ālam ke sivā kuchh bhī nahīñ

tū kahāñ aa.ī hai ai sub.h-e-bahār-e-ummīd

merī duniyā meñ shab-e-ġham ke sivā kuchh bhī nahīñ

ye haqīqat hai ki hastī kī haqīqat ai dost

ek nazzāra-e-’ālam ke sivā kuchh bhī nahīñ

allāh allāh ye hai ki kashmakash rāz-o-niyāz

chaar sū sho.ala-o-shabnam ke sivā kuchh bhī nahīñ

ḳhaak samjhegā vo rañgīnī-e-’ālam kā nikhār

paas jis ke Dil-e-pur-ġham ke sivā kuchh bhī nahīñ

maqsad-e-chashm-o-nazar shām-e-mohabbat kī qasam

is tirī kākul-e-pur-ḳham ke sivā kuchh bhī nahīñ

hosh kahte haiñ kise ahl-e-nazar duniyā meñ

zindagī laġhzish-e-paiham ke sivā kuchh bhī nahīñ

merī duniyā meñ na samjheñge zamāne vaale

haaye 'bahzād'-e-hazīñ ġham ke sivā kuchh bhī nahīñ

har nafas girya-o-matam ke siwa kuchh bhi nahin

zindagi kya hai tere gham ke siwa kuchh bhi nahin

ashk-e-hasrat lab-e-KHamosh fughan-e-mahrum

pas mere mere 'alam ke siwa kuchh bhi nahin

tu kahan aai hai ai subh-e-bahaar-e-ummid

meri duniya mein shab-e-gham ke siwa kuchh bhi nahin

ye haqiqat hai ki hasti ki haqiqat ai dost

ek nazzara-e-’alam ke siwa kuchh bhi nahin

allah allah ye hai ki kashmakash raaz-o-niyaz

chaar su shoala-o-shabnam ke siwa kuchh bhi nahin

KHak samjhega wo rangini-e-’alam ka nikhaar

pas jis ke Dil-e-pur-gham ke siwa kuchh bhi nahin

maqsad-e-chashm-o-nazar sham-e-mohabbat ki qasam

is teri kakul-e-pur-KHam ke siwa kuchh bhi nahin

hosh kahte hain kise ahl-e-nazar duniya mein

zindagi laghzish-e-paiham ke siwa kuchh bhi nahin

meri duniya mein na samjhenge zamane wale

haye 'bahzad'-e-hazin gham ke siwa kuchh bhi nahin