ہر نفس گریہ و ماتم کے سوا کچھ بھی نہیں

ہر نفس گریہ و ماتم کے سوا کچھ بھی نہیں

زندگی کیا ہے تیرے غم کے سوا کچھ بھی نہیں

اشکِ حسرت لب خاموش فغانِ محروم

پاس میرے، میرے عالم کے سوا کچھ بھی نہیں

تو کہاں آئی ہے اے صبح بہارِ امید

میری دنیا میں شبِ غم کے سوا کچھ بھی نہیں

یہ حقیقت ہے کہ ہستی کی حقیقت اے دوست

ایک نظارۂ عالم کے سوا کچھ بھی نہیں

اللہ اللہ یہ ہے کہ کشمکش راز و نیاز

چار سو شعلۂ و شبنم کے سوا کچھ بھی نہیں

خاک سمجھے گا وہ رنگینیٔ عالم کا نکھار

پاس جس کے دل پر غم کے سوا کچھ بھی نہیں

مقصد چشم و نظر شامِ محبت کی قسم

اس تری کا کل پر خم کے سوا کچھ بھی نہیں

ہوش کہتے ہیں کسے اہلِ نظر دنیا میں

زندگی لغزش پیہم کے سوا کچھ بھی نہیں

میری دنیا میں نہ سمجھیں گے زمانے والے

ہائے بہزادؔ حزیں غم کے سوا کچھ بھی نہیں