پھر میری آنکھوں میں آنسو آ گئے

پھر میری آنکھوں میں آنسو آ گئے

پھر فضا پر ابر سے کچھ چھا آ گئے

اللہ اللہ ان کا الطاف و کرم

جاتے جاتے کچھ مجھے سمجھا گئے

وہ نہ سمجھے میری الفت کی حدیں

اس مری دنیا سے دھوکا کھا گئے

کچھ میری آنکھوں میں آنسو رہ گئے

کچھ میرے دامن پہ آنسو آ گئے

مہر بھی ان کی جفا سے کم نہیں!

آئے تو لیکن مجھے تڑپا گئے

راہِ غم میں ایسے بھی رہرو ہیں جو

رہبروں کو راستہ بتلا گئے

زندگی بے کیف ہو کر رہ گئی

ہم محبت کا نتیجہ پا گئے

ان کے جلووں کے تصدق جائیے

پھر نگاہِ شوق کو تڑپا گئے

ہوگئے رگ رگ میں وہ جلوہ کناں

آج ہم بہزادؔ ان کو پا گئے