میرے چمن میں غموں کی بہار کیوں نہ رہی

میرے چمن میں غموں کی بہار کیوں نہ رہی

عجیب شے تھی شبِ انتظار کیوں نہ رہی

جھکی جھکی نظر آتی ہے چشمِ جلوہ طلب

نظر کو حسرتِ دیدار یار کیوں نہ رہی

ہے ماند ماند سے تارے بھی اور ذرے بھی

وہ دل فریبی لیل و نہار کیوں نہ رہی

لہو کا نام بھی اشکوں میں اب نہیں باقی

وہ دل کشی دلِ داغدار کیوں نہ رہی

نہ لب پہ نعرۂ مستانہ ہے نہ نالۂ شوق

وہ مستئی دلِ دیوانہ وار کیوں نہ رہی

کہاں گیا مرا ذوقِ سجود و شوقِ طلب

وہ بندگی در و بام یار کیوں نہ رہی

سکوں ملا ہے تو بہزادؔ سوچتا ہوں میں

وہ مجھ پہ رحمت پروردگار کیوں نہ رہی