ترے ملال سے وہ راہ و رسم کیوں نہ رہی

ترے ملال سے وہ راہ و رسم کیوں نہ رہی

لبوں پہ آہ وہ پہلی سی آہ کیوں نہ رہی؟

ترے ستم سے بڑا مطمئن تھا قلبِ حزیں

وہ لذت کرم گاہ گاہ کیوں نہ رہی

جسے بھی دیکھیے اک زیرِ لب تبسم ہے

مرے غموں کی یہ دنیا گواہ کیوں نہ رہی

یہ کس نے آکے الٹ دی بساطِ در دو الم

یہ زندگی میری آخر تباہ کیوں نہ رہی

سجود عشق سجود وفا سجود خیال

یہ زندگی بھی بہ نامِ گناہ کیوں نہ رہی

ہزار بار تو آئے تھے وجد میں کونین

جو جان نغمہ تھی لب پر وہ آہ کیوں نہ رہی

یہ کیسا نورِ مسرت چمک اٹھا بہزادؔ

غضب ہوا تیری دنیا تباہ کیوں نہ رہی