میکدے میں مجھ تک آخر دور جام آ ہی گیا

میکدے میں مجھ تک آخر دور جام آ ہی گیا

میرا رنگِ بے نیاز ی میرے کام آ ہی گیا

جذبۂ بے اختیارِ شوق تجھ کو کیا کہوں؟

میرے لب پر بے ارادہ ان کا نام آ ہی گیا

آستانِ یار کے قرباں مرا دورِ حیات

جس جگہ کھونا ہے مجھ کو وہ مقام آ ہی گیا

اک مرے آتے ہی میخانے میں ساقی کہہ اٹھا

بے نیاز ساغر و مینا و جام آ ہی گیا

خشک دامانی کا شکوہ کر رہی تھی زندگی

ایک تارا ٹوٹ کر بالائے بام آ ہی گیا

اک تصور کی بدولت اس طرح ہوں مطمئن

جیسے میرے پاس وہ محشر حرام آ ہی گیا

اب تو اے بہزادؔ خود ان کے پیام آنے لگی

میرا جذبِ شوق آخر میرے کام آ ہی گیا